काठमाडौं । सरकारले लक्ष्य अनुसारको राजस्व संकलन गर्न नसकिरहेको अवस्थामा पुस महिनाको अन्तिम दुईदिनमा नै ५८ अर्ब ९९ करोड ३८ लाख रुपैयाँ राजस्व संकलन गरेको छ । योसँगै सरकारले पुस महिनाको राजस्व लक्ष्य भेट्टाएको हो ।
सरकारले पुस महिनामा १ खर्ब ३५ अर्ब रुपैयाँ राजस्व संकलन गर्ने लक्ष्य राखेकोमा १ खर्ब ३७ अर्ब रुपैयाँभन्दा बढी राजस्व संकलन गरेको छ ।
सरकारले पुस २९ गते ४२ अर्ब ४६ करोड र २८ गते १५ अर्ब ८१ करोड रुपैयाँ राजस्व संकलन गरेको हो । सरकारले चालु आर्थिक वर्षमा पहिलो पटक पुस महिना लक्ष्यभन्दा बढी राजस्व संकलन गरेको हो ।
साउनदेखि नै लक्ष्य अनुसार राजस्व संकलन हुन सकेको थिएन । सरकारले पुस महिनामा आएर राजस्वको लक्ष्य पुरा गरेपनि विकास खर्चको स्थिति भने खासै सुधार आएको छैन । महालेखा नियन्त्रक कार्यालयका अनुसार अहिलेसम्म १३.७२ प्रतिशतमात्र विकास खर्च भएको छ ।
