काठमाडौं । सेयर बजारमा लगातार तेस्रो दिन दोहोरो अंकको वृद्धि भएको छ । गत बुधबारदेखि लगातार उकालो लागेको नेप्सेले आज पनि सोही लय कायम राखेको हो । तीन दिनमा नेप्से ११२ अंकले बढेको छ ।
आइतबार नेप्से परिसूचक ३२.२४ अंकले बढेर २६९५.५५ बिन्दुमा पुगेको छ । सूचकसँगै आज कारोबार रकममा पनि सुधार आएको छ । अघिल्लो दिनको तुलनामा कारोबार रकम सवा २ अर्बले बढेर ७ अर्ब ५६ करोड रुपैयाँ पुगेको छ ।
आज कारोबारमा आएका १३ वटा समूह मध्ये म्युचुअल फण्ड बाहेक अरु सबै समूहको परिसूचक बढेको छ । लगानी, फाइनान्स र अन्य समूहको परिसूचक २ प्रतिशतभन्दा धेरैले बढेको छ ।
आज पुनर्बीमा कम्पनीहरुको सेयरमा उच्च आकर्षण देखिएको छ । हिमालयन रि इन्स्योरेन्सको सर्वाधिक ६९ करोड १९ लाख रुपैयाँ बढीको सेयर किनबेच भएको छ । त्यस्तै, नेपाल पुर्नबीमा कम्पनीको दोस्रो धेरै ४७ करोड ८४ लाख रुपैयाँको कारोबार भएको छ ।
आज कारोबारमा आएका मध्ये २२२ कम्पनीको सेयर मूल्य बढेको छ भने २२ कम्पनीको मात्रै मूल्य घटेको छ ।
आज जोशी हाइड्रोपावरको सेयर मूल्य सर्वाधिक ९.९७ प्रतिशतले बढेको छ । त्यस्तै, दोर्दीखोला हाइड्रोपावर, तेह्रथुम पावर र गुँरास लघुवित्तका सेयरधनीले ६ प्रतिशतभन्दा धेरै कमाएका छन् ।
बढ्दो बजारमा आज सामुदायिक लघुवित्तका सेयरधनीले सबैभन्दा धेरै ३.९३ प्रतिशत गुमाएका छन् ।
