काठमाडौं । निर्जीवन बीमा व्यवसायमा सुधार आएको छ । गत आर्थिक वर्षको फागुनको तुलनामा चालु आव २०८१/८२ को सोही अवधिमा निर्जीवन बीमा कम्पनीको प्रिमियम संकलन ८.९१ प्रतिशतले बढेको हो ।
नेपाल बीमा प्राधिकरणको तथ्यांक अनुसार चालु आवको फागुनसम्म १८ निर्जीवन बीमा कम्पनी (१४ निर्जीवन र ४ निर्जीवन लघु बीमा)ले २८ अर्ब ६० करोड ८४ लाख रुपैयाँ बीमाशुल्क संकलन गरेका छन् । यो गत वर्षको सोही अवधिको तुलनामा २ अर्ब ३४ करोड रुपैयाँ धेरै हो । गत वर्ष फागुनसम्म निर्जीवन बीमा कम्पनीले कुल २६ अर्ब २६ करोड ८४ लाख रुपैयाँ बीमा शुल्क संकलन गरेका थिए ।
चालु आवको फागुनसम्म १४ निर्जीवन बीमा कम्पनीले कुल २८ अर्ब २ करोड ८८ लाख रुपैयाँ र ४ निर्जीवन लघुबीमा कम्पनीले ५७ करोड ९६ लाख रुपैयाँ प्रिमियम संकलन गरेका छन् ।
फागुन महिनामा मात्रै निर्जीवन बीमा कम्पनीहरूले ३ अर्ब ८३ करोड रुपैयाँ प्रिमियम संकलन गरेका छन् । यस महिना बीमा कम्पनीहरूले कुल ९ खर्ब १६ अर्ब रुपैयाँ बीमांक बराबरको बीमा गरेका हुन् ।
चालु आवको फागुनसम्म निर्जीवन बीमा कम्पनीहरूले कुल २० लाख ७३ हजार ४६३ वटा पोलिसी बिक्री गरेका छन् । यो गत वर्षको फागुनकोभन्दा १ लाख ११ हजार ४३९ वटा धेरै हो । गत वर्ष फागुनसम्म १९ लाख ६२ हजार २४ वटा पोलिसी बिक्री गरेका थिए ।
पछिल्लो समय अर्थतन्त्रमा क्रमशः सुधार देखिन थालेसँगै निर्जीवन बीमा व्यवसायमा पनि सुधार आएको हो । गत वर्ष घट्दो क्रममा रहेको निर्जीवन बीमा व्यवसायमा चालु वर्षमा भने महिनैपिच्छे बढ्दो क्रममा छ ।
मुख्यगरी निर्जीवन बीमा व्यवसायको एकतिहाई हिस्सा ओगट्ने सवारीसाधनको बिक्रीमा सुधार आउँदा समग्र बीमा व्यवसायमा सुधार आएको हो । त्यस्तै, सम्पत्ति बीमा गर्ने बढ्दा पनि व्यवसायमा सुधार देखिएको हो ।
यद्यपि, यस वर्ष बीमा कम्पनीहरूले व्यवसाय बढाए पनि दायित्व पनि ह्वात्तै बढेको लछ । गत असोज दोस्रो साता आएको बाढीपहिरोका कारण १३ अर्ब रुपैयाँ बढीको दाबी परेको छ । यो बीमा कम्पनीहरूको ३ महिनाको व्यवसाय बराबर हो ।
व्यवसायमा शिखर अगाडि
समीक्षा अवधिमा युनाइटेड अजोड, प्रभु र राष्ट्रिय बीमा कम्पनी बाहेक अरु सबैको व्यवसाय बढेको छ ।
निर्जीवन बीमा व्यवसायमा शिखर इन्स्योरेन्स नै लिडरको रुपमा देखिएको छ । ८ महिनामा शिखर इन्स्योरेन्सले सबैभन्दा धेरै ४ अर्ब १ करोड रुपैयाँ प्रिमियम संकलन गरेको छ । यस अवधिमा शिखरले १ लाख ९७ हजार २५८ वटा पोलिसी बेचेको छ ।
त्यस्तै, शिखरलाई पछ्याउँदै सगरमाथा लुम्बिनीले ३ अर्ब ३२ करोड रुपैयाँको व्यापार गर्दै दोस्रो स्थानमा रहेको छ । यसले ८ महिनामा १ लाख ८५ हजार ८७ वटा पोलिसी बेचेको छ । सिद्धार्थ प्रिमियर इन्स्योरेन्स बीमा शुल्क संकलनमा तेस्रो स्थानमा रहेको छ । ८ महिनामा सिद्धार्थले २ अर्ब ७५ करोड रुपैयाँ बीमा शुल्क उठाएको छ ।
त्यसैगरी, आइजीआई प्रुडेन्सियलले २ अर्ब ३७ करोड, हिमालयन एभरेष्टले २ अर्ब २१ करोड, नेकोले २ अर्ब १९ करोड, एनएलजीले १ अर्ब ८६ करोड, दी ओरेन्टलले १ अर्ब ७० करोड, युनाइटेड अजोडले १ अर्ब ६० करोड, सानिमा जीआइसीले १ अर्ब ५७ करोड, नेपाल इन्स्योरेन्सले १ अर्ब ४० करोड, प्रभु इन्स्योरेन्सले १ अर्ब १६ करोड र राष्ट्रिय बीमा कम्पनीले १ अर्ब ९ करोड रुपैयाँ प्रिमियम संकलन गरेको छ ।
फागुनसम्म नेशनल इन्स्योरेन्सले सबैभन्दा कम ७६ करोड ४८ लाख रुपैयाँको व्यवसाय गरेको छ ।
व्यवसाय बढाउँदै लघुबीमा कम्पनी
लघुबीमा कम्पनीहरूले पनि आफ्नो व्यवसाय बढाउँदै लगेका छन् । गत असारसम्म कुल निर्जीवन बीमा व्यवसायमा लघुबीमा कम्पनीहरूको हिस्सा १ प्रतिशतभन्दा कम रहँदै आएकोमा चालु आवको फागुन आइपुग्दा २ प्रतिशत पुर्याएका छन् ।
४ निर्जीवन लघुबीमा कम्पनीले फागुनसम्म ५७ करोड ९६ लाख रुपैयाँ बीमा शुल्क संकलन गरेका छन् । यो कुल निर्जीवन बीमा व्यवसायको २.०३ प्रतिशत हो ।
अघिल्लो वर्षदेखि संचालनमा आएका लघुबीमा कम्पनीहरूले क्रमशः आफ्नो व्यवसाय बढाउँदै लगेका हुन् । फागुनसम्म नेपाल माइक्रो इन्स्योरेन्सले १६ करोड ६४ लाख, प्रोटेक्टिभ माइक्रो इन्स्योरेन्सले १४ करोड ६३ लाख, स्टार माइक्रो इन्स्योरेन्सले १३ करोड ५१ लाख र ट्रष्ट माइक्रो इन्स्योरेन्सले १३ करोड १६ लाख रुपैयाँ बीमा शुल्क संकलन गरेका छन् ।
