काठमाडौं । सेयर बजारमा लगातार पाँचौं दिन वृद्धि भएको छ । गत आइतबारदेखि लगातार उकालो लागेको नेप्सेले आज पनि सोही लय कायम राखेको हो ।
आज दिनभरमा ७६ अंकको उतरचढाव आएको नेप्से अन्त्यमा दोहोरो अंकले बढेर बन्द भएको हो । आइतबार नेप्से परिसूचक ११.६६ अंकले बढेर २७५५.४० बिन्दुमा पुगेको छ ।
आज सूचकसँगै कारोबार रकममा पनि उछाल आएको छ । अघिल्लो दिनको तुलनामा कारोबार रकम झण्डै ३ अर्बले बढेर ११ अर्ब ५४ करोड रुपैयाँ पुगेको छ ।
आज कारोबारमा आएका १३ वटा समूहमध्ये ७ समूहको परिसूचक बढेको छ भने ६ को घटेको छ । अन्य समूहको परिसूचक सबैभन्दा धेरै ३.७२ प्रतिशतले बढेको छ भने व्यापार समूह १.३२ प्रतिशतले घटेको छ ।
आज पुनर्बीमा कम्पनीहरुको सेयरमा उच्च आकर्षण देखिएको छ । हिमालयन रि इन्स्योरेन्सको सर्वाधिक ९५ करोड ६४ लाख रुपैयाँ बराबरको सेयर किनबेच भएको छ । त्यस्तै, नेपाल पुनर्बीमाको ६० करोड २९ लाख रुपैयाँको कारोबार भएको छ ।
आज कारोबारमा आएका मध्ये ९२ कम्पनीको सेयर मूल्य बढेको छ भने १४७ कम्पनीको मूल्य घटेको छ ।
बढ्दो बजारमा आज गार्डियन माइक्रो लाइफ इन्स्योरेन्सको सेयर मूल्यमा पोजेटिभ सर्किट लागेको छ । यसका सेयरधनीले १० प्रतिशत कमाएका छन् ।
आज उपकार लघुवित्तका सेयरधनीले भने सर्वाधिक ६.७९ प्रतिशत गुमाएका छन् ।
