काठमाडौं । मर्जरमा गएका दुई लघुवित्त कम्पनीले आज (बुधबार) देखि संयुक्त कारोबार शुरु गरेका छन् । कालिका र जनसेवी लघुवित्त मर्जर भई कालिका लघुवित्त वित्तीय संस्थाको नामबाट कारोबार शुरु भएको छ ।
दुवै कम्पनीलाई एकीकृत कारोबारका लागि नेपाल राष्ट्र बैंकले पुस २ गते र कम्पनी रजिष्ट्रार कार्यालयले पुस ११ गते अन्तिम स्वीकृति दिएको थियो ।
दुवै कम्पनीको गत असोज २५ गते सम्पन्न विशेष साधारण सभाले मर्जर सम्बन्धि प्रस्ताव पारित गरेका थिए । मर्जरपछि कम्पनीको केन्द्रीय कार्यालय हाल कालिका लघुवित्तको केन्द्रीय कार्यालय रहेको स्थान स्याङजा, वालिङ वडा नं ८ मा हुनेछ ।
मर्जरमा जाने भएपछि नेपाल स्टक एक्सचेन्ज (नेप्से) मा कालिकाको शेयर कारोबार रोक्का भएको छ । जनसेवीले सर्वसाधारणमा बिक्री गरेको धेरै नभएकाले दोस्रो बजारमा कारोबार सुरु भैसकेको छैन । कालिकाको जेठ ६ गतेदेखि कारोबार रोक्का गरिएको नेप्सेले जनाएको छ ।
