काठमाडौं । अरुण भ्याली हाइड्रोपावरको खुद नाफामा उछाल आएको छ । कम्पनीले शुक्रबार सार्वजनिक गरेको चालु आर्थिक वर्ष २०८१/८२ को दोस्रो त्रैमासको अपरिष्कृत वित्तीय विवरण अनुसार खुद नाफा ७३४.९८ प्रतिशतले बढेकोे छ ।
कम्पनीले चालु आवको पुस मसान्तसम्म १९ करोड ४२ लाख रुपैयाँ खुद नाफा कमाएको छ । यो गत वर्षको सोही अवधिको तुलनामा १७ करोड १० लाख रुपैयाँ धेरै हो । अरुण भ्यालीले गत वर्षको दोस्रो त्रैमाससम्म २ करोड ३२ लाख रुपैयाँ खुद नाफा कमाएको थियो ।
समीक्षा अवधिमा अरुणको संचालन आम्दानी बढ्दा र खर्च घट्ना नाफामा उछाल आएको हो । यस अवधिमा कम्पनीको संचालन आम्दानी ३४१.२५ प्रतिशतले बढेर २५ करोड ९५ लाख रुपैयाँ पुगेको छ ।
त्यस्तै, समीक्षा अवधिमा कम्पनीको कुल खर्च ३६.८६ प्रतिशतले घटेर ७ करोड ७३ लाख रुपैयाँमा झरेको छ ।
हाल ३ अर्ब ८३ करोड ८० लाख रुपैयाँ चुक्ता पूँजी रहेको कम्पनीको जगेडा कोषमा २२ करोड २ लाख रुपैयाँ संचित छ ।
खुद नाफा बढेसँगै पनि कम्पनीको प्रतिसेयर आम्दानी पनि ४ गुणाले बढेको छ । गत पुसमा २.४९ रुपैयाँ रहेको कम्पनीको प्रतिसेयर आम्दानी यस वर्ष बढेर १०.०९ रुपैयाँ पुगेको छ
समीक्षा अवधिमा कम्पनीको प्रतिसेयर नेटवर्थ १०५.७२ रुपैयाँ छ ।
