काठमाडौं । नेपाल उद्योग वाणिज्य महासंघका अध्यक्ष चन्द्रप्रसाद ढकालले कुनै पनि बहानामा पूर्वाधार विकासमा अवरोध नर्गन आग्रह गरेका छन् ।
बिहीबार काठमाडौंको भृकुटीमण्डपमा सुरू भएको ‘क्यान इन्फोटेकको ३० औं संस्करणको उद्घाटन समारोहमा बोल्दै अध्यक्ष ढकालले यस्तो आग्रह गरेका हुन् ।
उनले विकास विरोधी गतिविधिले नेपालमा लगानी निरुत्साहित हुने धारणा बताए । उनले विकासलाई राजनीति र धर्म भन्दा माथि राखेर हेर्न राजनीतिक दल तथा आम नागरिकलाई आग्रह गरे ।
सरकारले आर्थिक विकासको लागि आन्तरिक तथा बाह्य लगानी भित्र्याउने र लगानीमैत्री वातावरण बनाउने भनिरहेको सन्दर्भमा पछिल्लो समय पूर्वाधारको विकास रोक्न विभिन्न तहबाट भइरहेका गतिविधिहरू खेदजनक रहेको अध्यक्ष ढकालको भनाइ छ ।
