काठमाडौं । बजारमा उपभोग्य वस्तुको माग क्रमशः बढ्न थालेको छ । पछिल्लो समय आर्थिक गतिविधमा केही सुधार आएसँगै बजारमा उपभोग्य वस्तुको पनि माग बढ्न थालेको हो ।
भन्सार विभागले सोमबार सार्वजनिक गरेको चालु आर्थिक वर्ष २०८१/८२ को छैटौं महिना (साउन–मंसिरको वैदेशिक व्यापार तथ्यांकले बजारमा उपभोग्य वस्तुको माग बढेको देखाएको हो ।
चालु आर्थिक वर्षको सुरुदेखि नै आयात खस्किँदो क्रममा थियो तर, मंसिरदेखि लगातार आयात बढेको हो । भन्सार विभागका अनुसार पुस महिनामा १ खर्ब ६० अर्ब ८८ करोड रुपैयाँ बढीको वस्तु आयात भएको हो । यो डेढ वर्ष यताकै धेरै हो ।
असारमा एक महिनामै डेढ खर्बको वस्तु आयात भएको थियो । त्यसयता लगातार घटेर कात्तिकमा १ खर्ब २३ अर्ब रुपैयँँमा सीमित भएको थियो । मंसिरमा १ खर्ब ४८ अर्बको वस्तु आयात भएकोमा पुसमा १ खर्ब ६१ अर्ब रुपैयाँ पुगेको हो ।
मंसिरको तुलनामा पुसमा आयात १२ अर्ब रुपैयाँले बढेको हो । विभागका अनुसार चालु आवको ६ महिनामा कुल ८ खर्ब २२ अर्ब रुपैयाँ बढीको वस्तु आयात भएको छ । यो गत वर्ष सोही अवधिको तुलनामा ७.०६ प्रतिशतले धेरै हो । गत वर्ष ६ महिनामा कुल ७ खर्ब ६८ अर्ब रुपैयाँको आयात भएको थियो ।
पछिल्लो समय आर्थिक गतिविधि बढ्दा बजारमा उपभोग्य वस्तुको माग बढ्न गई आयात पनि बढेको हो । हिउँद लागेसँगै निर्माण गतिविधि बढेका छन् । जसकारण उपभोग्य वस्तु र औद्योगिक कच्चा पदार्थको आयात बढ्दा समग्रमा आयात पनि बढेको हो । अहिले डण्डी, सिमेन्ट लगायत उद्योगहरूले कच्चा पद्धार्थको आयात बढाएको देखिन्छ ।
निर्यात ३२ प्रतिशतले बढ्यो
चालु आवमा निर्यात ह्वात्तै बढेको छ । विभागका अनुसार गत वर्षको तुलनामा यस वर्ष निर्यात ३१.७८ प्रतिशत बढेको हो ।
पुससम्म नेपालबाट ९८ अर्ब ७९ करोड रुपैयाँको वस्तु विदेशिएको छ । गत वर्ष यही अवधिमा ७४ अर्ब ९६ करोडको वस्तु निर्यात भएको थियो ।
पुसमा मात्रै २५ अर्बको सामान निर्यात भएको छ । मंसिरमा २१ अर्बको निर्यात भएको थियो । चालु आवको पहिलो तीन महिना घट्दो क्रममा रहेको निर्यात कात्तिकदेखि भने लगातार बढ्न थालेको हो ।
व्यापार घाटा पनि बढ्यो
आयात बढेसँगै व्यापार घाटा पनि बढेको छ । चालु आवको पुससम्म गत वर्षको तुलनामा व्यापार घाटा ४.३८ प्रतिशतले बढेको हो ।
समीक्षा अवधिमा व्यापार घाटा साढे १३ अर्बले बढेर ७ खर्ब २३ अर्ब रुपैयाँ पुगेको छ । गत वर्ष यही अवधिमा व्यापार घाटा ६ खर्ब ९३ अर्ब रुपैयाँ थियो ।
पुससम्म कुल ९ खर्ब २१ अर्ब रुपैयाँ बराबरको वैदेशिक व्यापार भएको छ । यो गत वर्षको सोही अवधिको तुलनामा ९.२५ प्रतिशत धेरै हो ।
