काठमाडौं । एनआइसी एशिया बैंकको खुद नाफामा भारी गिरावट आएको छ । बैंकले सोमबार सार्वजनिक गरेको चालु आर्थिक वर्ष २०८१/८२ को दोस्रो त्रैमासको अपरिष्कृत वित्तीय विवरण खुद नाफा ९२.०३ प्रतिशतले घटेकोे हो ।
बैंकले पुस मसान्तसम्म १५ करोड १७ लाख रुपैयाँ खुद नाफा कमाएको छ । यो गत वर्षको सोही अवधिको १ अर्ब ७५ करोड रुपैयाँ कम हो । बैंकले गत वर्ष पुससम्म १ अर्ब ९० करोड रुपैयाँ खुद नाफा कमाएको थियो ।
समीक्षा अवधिमा बैंकको खुद ब्याज आम्दानी घट्दा र इम्पेयरमेन्ट चार्ज घट्दा नाफामा भारी गिरावट आएको हो । खराब कर्जा बढेपछि बैंकले २ अर्ब ३५ करोड रुपैयाँ प्रोभिजन गरेको छ ।
समीक्षा अवधिमा बैंकको खुद ब्याज आम्दानी ६.४० प्रतिशतले घटेर ५ अर्ब १८ करोड रुपैयाँमा सीमित भएको छ । त्यस्तै, बैंकको सञ्चालन नाफा ९०.४ प्रतिशतले घटेर ३४ करोड रुपैयाँमा सीमित भएको छ ।
समीक्षा अवधिमा बैंकले ३ खर्ब ८ अर्ब रुपैयाँ निक्षेप संकलन गरी २ खर्ब ४५ अर्ब रुपैयाँ कर्जा प्रवाह गरेको छ । यस अवधिमा बैंकको निक्षेप १२.९२ प्रतिशत र कर्जा लगानी ९.६३ प्रतिशतले घटेको हो ।
हाल १४ अर्ब ९१ करोड चुक्ता पूँजी रहेको बैंकको रिटेन्ड अर्निङ २ अर्ब ६५ करोड रुपैयाँ ऋणात्मक छ । यस अवधिमा बैंकको जगेडा कोषमा १७ अर्ब ४१ करोड संचित छ । पुससम्म बैंकको वितरणयोग्य नाफा २ अर्ब ६५ करोड रुपैयाँ ऋणात्मक छ ।
खुद नाफा घटेसँगै बैंकको प्रतिसेयर आम्दानीमा पनि भारी गिरावट आएको छ । समीक्षा अवधिमा बैंकको प्रतिसेयर आम्दानी २५.५९ रुपैयाँबाट घटेर २.०३ रुपैयाँमा झरेको छ ।
पुससम्म बैंकको प्रतिसेयर नेटवर्थ १९८.९२ रुपैयाँ, बेसरेट ७.५२ प्रतिशत, सीडी रेसियो ८३.१९ प्रतिशत रहेको छ । यस अवधिमा बैंकको कुल खराब कर्जा १.१९ प्रतिशतबाट बढेर ४.६१ प्रतिशत पुगेको छ ।
