काठमाडौं । गत असोजको ११ र १२ को अविरल वर्षापछिको बाढीपहिरोका कारण भएको जनधनको क्षतिबाट बीमा कम्पनीहरुमा झण्डै १३अर्ब रुपैयाँ बराबरको दाबी परेको छ ।
नेपाल बीमा प्राधिकरणका अनुसार पुस ११ गतेसम्म १८ निर्जीवन बीमा कम्पनीमा कुल १२ अर्ब ८८ करोड ९३ लाख ६१ हजार ५७ रुपैयाँ बराबरको बीमा परेको हो । ३ हजार ६७६ निवेदनमार्फत उक्त रकम बीमा दाबी गरिएको हो ।
प्राधिकरणका अनुसार कुल दाबीमध्ये पुस ११ गतेसम्म १ अर्ब ५२ करोड १८ लाख ९ हजार ३१८ रूपैयाँ बराबरको दाबी भुक्तानी भएको छ । ३ हजार ६७६ निवदेनमध्ये हालसम्म १ हजार ७२० वटाको दाबी भुक्तानी गरिएको हो । ठूलो रकम बीमा दाबी भए पनि कम्पनीहरुले भने न्यून मात्रमा भुक्तानी गरेको देखिएको छ ।
बाढी पहिरोको क्षतिबाट परेको बीमा दाबी रकम निर्जीवन बीमा कम्पनीहरुले चालु आवको ४ महिनामा गरेको कुल व्यवसायभन्दा १ अर्ब रुपैयाँ मात्रै कम हो । कात्तिकसम्म १८ कम्पनीले १४ अर्ब ३५ करोड ८६ लाख रुपैयाँको व्यवसाय गरेका छन् ।
