काठमाडौं । बीमा कम्पनीहरूका लागि घरजग्गा खरिद बिक्री गर्न मापदण्ड तयार बनाइएको छ । नेपाल बीमा प्राधिकरणले बीमा कम्पनीहरूको स्थिर सम्पत्ति खरिद, निर्माण तथा बिक्री प्रक्रियालाई व्यवस्थित, पारदर्शी तथा मितव्ययी बनाउन ‘बीमकको स्थिर सम्पत्ति सम्बन्धी निर्देशन २०८१’ को मस्यौदा तयार पारेको हो ।
प्राधिकरणले जीवन, निर्जीवन, लघु तथा पुनर्बीमा कम्पनीहरूका लागि घरजग्गा खरिद बिक्री सम्बन्धी मापदण्डहरूको मस्यौदा तयार पारेको हो । प्राधिकरणले मस्यौदा सार्वजनिक गर्दै सरोकारवालाहरूलाई ७ दिनभित्र राय सुझाव माग दिन आग्रह समेत गरेको छ ।
प्रस्तावित मस्यौदा अनुसार बीमकले घरजग्गा खरिद, निर्माण गर्नुपूर्व प्राधिकरणबाट सैद्धान्तिक तथा अन्तिम स्वीकृति लिनुपर्ने व्यवस्था गरिएको छ । तर, घरजग्गा बाहेकका अन्य सम्पत्ति खरिद गर्दा भने प्राधिकरणको अनुमति लिनुपर्ने छैन् ।
बीमा कम्पनीहरूले कार्यालय प्रयोजनका लागि स्थिर सम्पत्ति खरिद तथा निर्माण गर्दा बीमकले हालसम्म खरिद गरेको स्थिर सम्पत्तिको ह्रासकट्टी पछिको हुन आउने खुद मूल्य र खरिद गर्न स्वीकृति माग गरेको स्थिर सम्पत्तिको लागतको योगफल गणना गरिएको नेटवर्थको ३० प्रतिशतको सीमाभित्र रहनुपर्नेछ । नेटवर्थको २ प्रतिशतभन्दा कम निर्माण लागत हुन गएमा प्राधिकरणको स्वीकृति लिनुपर्ने छैन । नेटवर्थ गणना गर्दा पछिल्लो लेखापरीक्षण गरिएको वित्तीय विवरणको आधारमा गर्नुपर्ने प्राधिकरणले जनाएको छ ।
त्यस्तै, बीमकले घरजग्गा खरिद, निर्माण गर्न निवेदन पेश गर्दा उक्त खरिद निर्माणको प्रयोजन समेत खुलाउनुपर्नेछ । कार्यालय प्रयोजन, व्यावसायिक प्रयोजन र कार्यालय तथा व्यावसायिक कुन हो खुलाउनु पर्नेछ । साथै, कार्यालय प्रयोजनको लागि प्रयोग हुने र व्यावसायिक प्रयोजनका लागि प्रयोग हुने हिस्साको लागत र प्रतिशत खुलाई निवेदन दिनुपर्नेछ । व्यावसायिक प्रयोजनको लागि मात्र भए बीमकको लगानी निर्देशन बमोजिम स्वीकृति प्रदान गरिने व्यवस्था गरिएको छ ।
त्यसैगरी, बीमा कम्पनीहरूले आफ्नो आर्थिक प्रशासन विनियमावली बमोजिम घरजग्गा खरिद, निर्माण गर्नु अघि आवश्यक विवरण तथा कागजातसहित खरिद निर्माणको प्रयोजन खुलाई सैद्धान्तिक स्वीकृतिका लागि प्राधिकरणमा निवेदन दिनुपर्नेछ । सैद्धान्तिक स्वीकृति प्राप्त भएको मितिले ४ महिना भित्रमा खरिद, निर्माण प्रक्रिया अघि बढेको प्रमाण पेश गर्नुपर्नेछ । नत्र सो स्वीकृति स्वतः रद्द हुने मस्यौदामा उल्लेख छ ।
सैद्धान्तिक स्वीकृति प्राप्त भएपछि तोकिए बमोजिमको विवरण तथा कागजातसहित अन्तिम स्वीकृतिको लागि प्राधिकरणमा निवेदन दिनुपर्नेछ । प्राधिकरणबाट अन्तिम स्वीकृति प्राप्त भएको मितिले २ महिनाभित्रमा खरिद प्रक्रिया अन्तिम चरणमा पुगेको प्रमाण पेश गर्नुपर्नेछ । अन्यथा स्वीकृति स्वतः रद्द हुनेछ ।
बीमा कम्पनीहरूले घर निर्माण गर्दा प्राधिकरणबाट अन्तिम स्वीकृति प्राएको २ महिना भित्र निर्माण कार्य सुरू गर्नुपर्नेछ ।
त्यस्तै, बीमा कम्पनीहरूले आफनो स्वामित्वमा रहेको वा स्व–प्रयोजनमा प्रयोग भएको घरजग्गा बिक्री गर्दा बिक्री मूल्य गणना गरिएको नेटवर्थको १० प्रतिशत वा सोभन्दा बढी भएमा प्राधिकरण समक्ष स्वीकृतिका लागि निवेदन दिनुपर्नेछ । बीमकले आफनो स्वामित्वमा भएको घर जग्गा बिक्री गरेमा बिक्रीको शर्त, बिक्री मूल्य र खरिदकर्ताको विवरण बिक्री गरेको १५ दिन भित्र प्राधिकरणमा जानकारी गराउनुपर्नेछ ।
यस्तो छ मस्यौदा
