गोदावरी । धनगढी-खुटिया-दिपायल द्रुतमार्गमा निर्माणाधीन ८ पुलको काम प्रभावित भएको छ । धनगढी-खुटिया-दिपायल द्रुतमार्ग आयोजना कार्यालयका इन्जिनियर दिनेश रैखोलाका अनुसार बजेट अभावमा सो सडकका कैलाली र डोटीका आठ स्थानमा निर्माणाधीन पुलको काम प्रभावित भएको हो ।
उक्त सडक आयोजना कार्यालयले ३ वर्षअघि २०७८ माघमा ६ वटा र २०७९ जेठमा दुई गरी ८ पुल निर्माणका लागि २८ करोड ७५ लाख रुपैयाँमा ठेक्का लगाएको थियो । पर्याप्त बजेट विनियोजन नहुँदा पुल निर्माणको कामले गति लिन नसकेको इन्जिनियर रैखोलाले जानकारी दिए ।
आयोजना कार्यालयले दिएको जानकारीअनुसार चप्टे नदीमा पुल निर्माण गर्न २ करोड ९७ लाख, मटेलीमा ३ करोड २६ लाख रुपैयाँ र चौकीगडा पुलका लागि ४ करोड ७० लाख रुपैयाँमा तथा सलेनामा सालाकोट पुल निर्माण गर्न ३ करोड ५१ लाख रुपैयाँमा निर्माण कम्पनीसँग सम्झौता भएको थियो ।
यसैगरी, कालाखोल-लामगाडा पुल ४ करोड ५ लाख रुपैयाँ, नकुराडी खोलाको पुल ३ करोड ८२ लाख, कैलालीको हाटखोली र ग्वासी खोलामा बन्ने पुलका लागि क्रमशः ५ करोड १९ लाख तथा ४ करोड ५० लाख रुपैयाँमा निर्माण कम्पनीसँग सम्झौता भएको इन्जिनियर रैखोलाले बताए ।
८ वटै पुलका निर्माणका लागि गत आर्थिक वर्ष २०८०/८१ मा ४०/४० लाख रुपैयाँका दरले बजेट विनियोजन गरिएको थियो भने चालु आर्थिक वर्ष २०८१/८२ मा ८०/८० लाख रुपैयाँका दरले प्रतिपुल निर्माण गर्न बजेट विनियोजन गरिएको उनले जानकारी दिए ।
धनगढीदेखि बझाङको थलारासम्मको १८६ किलोमिटर सडकमा २३ किलोमिटर सडक कालोपत्र भएको छ भने ३६ किलोमिटर सडक कालोपत्र गर्न तीन खण्डमा ठेक्का लगाइएको सडक आयोजना कार्यालयले जनाएको छ । रासस
