काठमाडौं । अमेरिकी राष्ट्रपति डोनाल्ड ट्रम्पले पदभार सम्हालेकै दिन चीन, मेक्सिको र क्यानडाबाट आयात हुने वस्तुमा थप शुल्क लगाउने घोषणा गरेका छन् ।
राष्ट्रपति ट्रम्पले २०२५ जनवरी २० तारिखमा पदभार ग्रहण गरेपछि मेक्सिको र क्यानडाबाट आउने सबै सामानमा २५ प्रतिशत शुल्क लगाउने कार्यकारी आदेशमा हस्ताक्षर गर्ने बताएका हुन् ।
त्यस्तै, चीनबाट आयात हुने वस्तुमा १० प्रतिशत अतिरिक्त शुल्क लगाइने पनि उनले घोषणा गरेका छन् ।
लागूऔषध, अवैध रूपमा सीमा पार गर्ने आप्रवासीहरूलाई नरोकेसम्म मेक्सिको र क्यानडा माथि लगाइएको कर नहट्ने पनि उनले बताए । ‘यो उनीहरूको लागि धेरै ठूलो मूल्य तिर्ने समय हो,’ ट्रम्पले भनेका छन् ।
चिनियाँ अधिकारीहरूले फेन्टानिलको कारोबार गर्दा पक्राउ परेका मानिसहरूलाई मृत्युदण्ड दिने प्रतिज्ञा पूरा गर्न असफल भएको भन्दै ट्रम्प चीनसँग पनि आक्रोसित भएका छन् ।
आफ्नो चुनावी अभियानको क्रममा ट्रम्पले चीनमा निर्मित सबै उत्पादनहरूमा ६० प्रतिशतभन्दा धेरै शुल्क लगाउने बताएका थिए ।
