काठमाडौं । अब श्रम स्वीकृति भएका नेपाली नागरिकहरूलाई भारतको विमानस्थल हुँदै श्रम गन्तव्य देशमा जान नो अब्जेक्सन सर्टिफिकेट (एनओसी) नचाहिने व्यवस्था लागू गरिएको छ ।
दिल्लीस्थित नेपाली राजदूतावासले सूचना जारी गर्दै यस्तो जानकारी गराएको हो । ‘वैदेशिक रोजगार विभागले श्रम स्वीकृति दिएका नेपालीहरूका लागि दूतावासबाट एनओसी लिन पर्नेछैन,’ दूतावासको सूचनामा भनिएको छ ।
दूतावासका अनुसार अब नेपाल सरकारबाट श्रम स्वीकृति लिएका नागरिक भारतको विमानस्थल हुँदै साउदी अरब, कतार, कुवेत, संयुक्त अरब इमिरेट्स, ओमान, बहराइन, इराक, लिबिया र लेबनान जाँन सक्नेछन् । तर, अन्य प्रयोजनका लागि जानेले भने अनिवार्य एनओसी लिनुपर्नेछ ।
त्यसैगरी, नेपाली कूटनीतिकरआधिकारिकरसेवा राहदानी धारकहरू, संयुक्त राष्ट्र संघ लायसेज÷पासर (यूएनएलपी) भएका नेपाली नागरिकहरू र १६ वर्ष मुनिका नेपाली नाबालिगहरूलाई पनि एनओसी आवश्यक पर्ने छैन ।
अमेरिका, बेलायत तथा सेनजेन मुलुकको भिसा भएका नेपाली नागरिकहरूलाई पनि एनओसी चाहिने छैन भने रुस सरकारबाट छात्रवृत्ति प्राप्त गर्ने र व्यावसायिक भिसा हुनेहरू बाहेक रसिया जाने यात्रुहरूले भने दूतावास वा नेपालको कन्सुलर सेवा विभागबाट एनओसी प्राप्त गर्नुपर्ने छ ।
ट्राभल एनओसी आवश्यक पर्ने नेपाली नागरिकहरूलाई इमेलमार्फत दूतावासको वेबसाइटमा उल्लेख गरिएका सबै आवश्यक कागजातहरू सहित तोकिएको मितिभन्दा कम्तीमा ७ दिन अगाडि सम्पर्क गर्न दूतावासले आग्रह गरेको छ ।
यात्रा एनओसीको सेवा शुल्क प्रति व्यक्ति १ हजार भारतीय रुपैयाँ तोकिएको छ ।
