काठमाडौं । ऊर्जा, जलस्रोत तथा सिंचाइ राज्यमन्त्री पूर्णबहादुर तामाङ (कान्छाराम) को कान्छाराम कन्स्ट्रक्सनसहित एक दर्जन बढी कम्पनीहरूलाई कालोसूचीमा परेका छन् ।
सार्वजनिक खरिद अनुगमन कार्यालयले शुक्रबार एक सूचना जारी गर्दै कान्छारामसहित १३ कम्पनीलाई कालोसूचीमा राखिएको जानकारी गराएको हो ।
कार्यालयले ती निर्माण तथा आपूर्ति कम्पनीलाई सार्वजनिक खरिद ऐन, २०६३ को दफा ६३ को उपदफा (१) बमोजिम १ देखि साढे २ वर्षका लागि कालोसूचीमा राखेको हो । विभिन्न निकायहरूको सिफारिसमा ती कम्पनीलाई कालोसूचीमा राखिएको कार्यालयले जनाएको छ ।
कार्यालयका अनुसार राज्यमन्त्री पूर्णबहादुर तामाङ (कान्छाराम) मुख्य व्यक्ति रहेको कान्छाराम कन्स्ट्रक्सन, रमिला लामा मुख्य व्यक्ति र दीपक थिङ आधिकारिक व्यक्ति रहेको एन.बी. कन्स्ट्रक्सन, टेन्डी शेर्पा मुख्य व्यक्ति भएको द कञ्चनजंघा कन्स्ट्रक्सन र सुबित श्रेष्ठ मुख्य व्यक्ति भएको बिरुवा कन्स्ट्रक्सन साढे २ वर्षसम्म कालोसूचीमा परेका छन् । ऊर्जा राज्यमन्त्री तामाङ नेपाली कांग्रेस रामेछापका सभापति समेत हुन् ।
उनीहरूले लिएको ठेक्काको काम सन्तोषजनक नभएको भन्दै कम्पनीलाई संघीय सडक सुपरीवेक्षण तथा अनुगमन कार्यालय, तुम्लिङटारले कालोसूचीमा राख्न सिफारिस गरेको थियो।
त्यस्तै, कार्यालयले सुवित श्रेष्ठको बिरुवा कन्स्ट्रक्सन र बुद्धिमान गोलेको बीजी निर्माण सेवालाई कालोसूचीमा राखेको छ ।
त्यसैगरी, पूजा कन्स्ट्रक्सन (धनकुटा), साह निर्माण सेवा (सुनसरी), स्काइ लाइन कन्स्ट्रक्सन (धनुषा), शक्ति निर्माण सेवा (मकवानपुर) र आरएन बिल्डर्स (मकवानपुर)लाई डेढ वर्षका लागि कालोसूचीमा राखिएको कार्यालयले जनाएको छ ।
यूभी इन्जिनीयरिङ कन्सल्टेन्सी (काठमाडौं), नाटेश्वरी निर्माण सेवा एण्ड अडर सप्लायर्स (काठमाडौं), महालक्ष्मी एण्ड कम्पनी (मकवानपुर) र विर्ता कन्स्ट्रक्सन (काभ्रे)लाई १ वर्षका लागि कालोसूचीमा राखिएको छ ।
कालोसूचीमा परेका कम्पनीले अब तोकिएको अवधिमासम्म सरकारी निकायको कुनै पनि खरिद तथा निर्माणका कार्यमा भाग लिन पाउने छैनन् । कालोसूचीमा राख्नुभन्दा अगाडि सम्झौता भएका कार्य भने निरन्तर हुने कार्यालयले जनाएको छ।
