काठमाडौं । निर्जीवन बीमा व्यवसायमा सुधार आएको छ । गत आर्थिक वर्षको असोजको तुलनामा चालु आवको साेही अवधिमा निर्जीवन बीमा कम्पनीको प्रिमियम संकलन १०.७० प्रतिशतले बढेको हो ।
नेपाल बीमा प्राधिकरणको तथ्यांक अनुसार चालु आवको असोजसम्म १४ निर्जीवन र ४ निर्जीवन लघु बीमा गरी १८ कम्पनीले ११ अर्ब ५७ करोड ३६ लाख रुपैयाँ बीमाशुल्क संकलन गरेका छन् । यो गत वर्षको सोही अवधिको तुलनामा १ अर्ब ११ करोड ८९ लाख रुपैयाँ धेरै हो । गत वर्ष असोजमा निर्जीवन बीमा कम्पनीले कुल १० अर्ब ४५ करोड ४७ लाख रुपैयाँ बीमा शुल्क संकलन गरेका थिए ।
चालु आवको असोजसम्म १४ निर्जीवन बीमा कम्पनीले कुल ११ अर्ब ३८ करोड ७९ लाख रुपैयाँ र ४ निर्जीवन लघुबीमा कम्पनीले १८ करोड ५६ लाख रुपैयाँ प्रिमियम संकलन गरेका छन् ।
चालु आवको असोजसम्म निर्जीवन बीमा कम्पनीहरूले कुल ७ लाख ३७ हजार ९३० वटा पोलिसी बिक्री गरेका छन् । यो गत वर्षको असोजकोभन्दा ५३ हजार ४९४ वटा धेरै हो । गत वर्ष असोजमा ६ लाख ८४ हजार ४३६ वटा पोलिसी बिक्री गरेका थिए ।
पछिल्लो समय अर्थतन्त्रमा क्रमशः सुधार देखिन थालेसँगै निर्जीवन बीमा व्यवसायमा पनि सुधार आएको हो । गत वर्ष माघसम्म घट्दो क्रममा रहेको निर्जीवन बीमा व्यवसायमा फागुनदेखि क्रमशः सुधार हुँदै आएको छ ।
मुख्यगरी निर्जीवन बीमा व्यवसायको एकतिहाई हिस्सा ओगट्ने सवारीसाधनको बिक्रीमा सुधार आउँदा समग्र बीमा व्यवसायमा सुधार आएको हो । त्यस्तै, सम्पत्ति बीमा गर्ने बढ्दा पनि व्यवसायमा सुधार देखिएको हो ।
यद्यपि, यस वर्ष बीमा कम्पनीहरूले व्यवसाय बढाए पनि दायित्व पनि ह्वात्तै बढेको लछ । गत असोज दोस्रो साता आएको बाढीपहिरोका कारण सवा ९ अर्ब रुपैयाँ बढीको दाबी परेको छ । यो बीमा कम्पनीहरूको झण्डै ३ महिनाको व्यवसाय बराबर हो ।
सगरमाथाले शिखरलाई उछिन्यो
निर्जीवन बीमा कम्पनी मध्ये व्यवसाय लिड गर्न मुख्य ३ कम्पनीहरू बीच मुख्य प्रतिस्पर्धा देखिएको छ । शिखर, सगरमाथा लुम्बिनी र सिद्धार्थ प्रिमियर बीच कडा टक्कर देखिएको हो ।
निर्जीवन बीमा व्यवसायमा आफ्नो वर्चश्व राख्दै आएको शिखरलाई यसपटक सगरमाथा लुम्बिनी (सलिको)इन्स्योरेन्सले उछिनेको छ । असोजसम्म सलिकोले सबैभन्दा धेरै १ अर्ब ३१ करोड रुपैयाँ बीमा शुल्क संकलन गरेको छ । यो शिखरकोभन्दा २७ करोड रुपैयाँ धेरै हो ।
त्यस्तै, सिद्धार्थ प्रिमियरले पनि व्यवसायमा शिखरलाई उछिनेको छ । १ अर्ब ६ करोड बीमा शुल्क उठाउँदै सिद्धार्थ प्रिमियर दोस्रो धेरै व्यवसाय गर्ने कम्पनी बनेको छ ।
विगतमा व्यवसायमा पहिलो स्थानमा रहँदै आएको शिखर असोजमा तेस्रो स्थानमा पुगेको छ । शिखरले १ अर्ब ४ करोड १२ लाख रुपैयाँ बीमा शुल्क संकलन गरेको छ ।
असोजसम्म हिमालयन एभरेष्ट इन्स्योरेन्सले ९४ करोड ८३ लाख, आइजीआइ प्रुडेन्सियल ८६ करोड १५ लाख, नेको ८४ करोड ३ लाख, युनाटेड अजोड ७० करोड, एनएलजी साढे ६७ करोड, सापनमा जीआइसी ६० करोड, प्रभु साढे ५६ करोड, राष्ट्रिय बीमा कम्पनी साढे ५५ करोड, दी ओरियन्टल साढे ५२ करोड र नेपाल इन्स्योरेन्सले साढे ३७ करोड रुपैयाँ बीमा शुलक संकलन गरेको छ ।
असोजसम्म नेशनलले सबैभन्दा कम ३७ करोड २० लाख रुपैयाँको व्यवसाय गरेको छ ।
व्यवसाय बढाउँदै लघुबीमा कम्पनी
लघुबीमा कम्पनीहरूले पनि आफ्नो व्यवसाय बढाउँदै लगेका छन् । गत असारसम्म कुल निर्जीवन बीमा व्यवसायमा लघुबीमा कम्पनीहरूको हिस्सा १ प्रतिशतभन्दा कम रहँदै आएकोमा चालु आवको असोज आइपुग्दा १ प्रतिशत माथि पुर्याएका छन् ।
४ निर्जीवन लघुबीमा कम्पनीले असोजसम्म १८ करोड ५६ लाख रुपैयाँ बीमा शुल्क संकलन गरेका छन् । यो कुल निर्जीवन बीमा व्यवसायको १.६० प्रतिशत हो ।
अघिल्लो वर्षदेखि संचालनमा आएका लघुबीमा कम्पनीहरूले क्रमशः आफ्नो व्यवसाय बढाउँदै लगेका हुन् । असोजसम्म नेपाल माइक्रो इन्स्योरेन्सले ५ करोड ५० लाख, प्रोटेक्टिभ माइक्रो इन्स्योरेन्सले ४ करोड ६१ लाख, स्टार माइक्रो इन्स्योरेन्सले ४ करोड १८ लाख र ट्रष्ट माइक्रो इन्स्योरेन्सले ४ करोड २६ लाख रुपैयाँ बीमा शुल्क संकलन गरेका छन् ।
