काठमाडौं । सेयर बजारमा दोहोरो अंकको वृद्धि भएको छ । गत बुधारबारदेखि लगातार ओरालो लागेको नेप्सेले आज २७ अंकले फर्केको हो ।
सोमबार नेप्से परिसूचक २७.४१ अंकले बढेर २६४५.३६ बिन्दुमा पुगेको छ । आज ३०७ कम्पनीको १ करोड ४ लाख १८ हजार ९२६ कित्ता सेयर किनबेच भएको छ ।
आज सूचकसँगै कारोबार रकममा पनि वृद्धि भएको छ । अघिल्लो दिनको तुलनामा कारोबार रकम ६१ करोड रुपैयाँले बढेर ५ अर्ब ३४ करोड रुपैयाँ पुगेको छ ।
आज कारोबारमा आएका १३ वटै समूहको परिसूचक बढेको छ । फाइनान्स समूहको परिसूचक सर्वाधिक ३.४६ प्रतिशतले बढेको छ ।
आज नेपाल फाइनान्सको सर्वाधिक ३३ करोड ७९ लाख रुपैयाँको सेयर किनबेच भएको छ । त्यस्तै, समृद्धि फाइनान्सको २४ करोड ७६ लाख रुपैयाँको कारोबार भएको छ ।
आज कारोबारमा आएका मध्ये २१३ कम्पनीको सेयर मूल्य बढेको छ भने २८ कम्पनीको मूल्य घटेको छ ।
बढ्दो बजारमा आज २ कम्पनीको सेयर मूल्यमा पोजेटिभ सर्किट लागेको छ । जानकी फाइनान्स र दोल्ती पावरका सेयरधनीले ठ्याक्कै १० प्रतिशत कमाएका छन् ।
पिपुल्स हाइड्रोपावरका सेयरधनीले सर्वाधिक ६.०२ प्रतिशत गुमाएका छन् ।
