काठमाडौं । राष्ट्रिय गौरवको नागढुङ्गा सुरुङमार्गको कंक्रिट लाइनिङ ( सिलिङ ढलान) को काम सकिएको छ । नागढुंगा सुरुङमार्ग आयोजनाका अनुसार सुरुङमार्गको मुख्य र आपतकालीन दुवै सुरुङको कंक्रिट लाइनिङको काम सकिएको हो ।
आयोजनाको मुख्य सुरुङ २०८१ वैशाख ३ गते र आपतकालीन सुरुङ २०८० साउन २२ गते ब्रेक थ्रु गरिएको थियो । आयोजनाको मुख्य सुरुङ २६८८ मिटर र आपतकालीन सुरुङ २५५७ मिटर लामो छ । हालै ती सुरुङको कंक्रिट लाइनिङको काम समेत सकिएको हो ।
आयोजनाका उप निर्देशक सञ्जय पन्थीका अनुसार अहिले सुरुङमार्गमा फिनसिङका अन्य काम सँगसँगै भइरहेको छ । सुरुङमार्ग भित्र अक्सिजन, लाइट, भेन्टिलेसन, टेलिफोन, जेट पङ्खालगायतका संरचना जडानको काम पनि भइरहेको उनले जानकारी दिए ।
उनका अनुसार हालसम्म आयोजनाको समग्रमा भौतिक प्रगति ८०.५ प्रतिशत पुगेको छ । अब १९.५ प्रतिशत काम बाँकी छ । त्यस्तै, वित्तीयतर्फ ७४.७० प्रगिति भएको छ ।
सुरुङमार्ग अन्तर्गत निर्माण् गर्नुपर्ने संरचनामध्ये अब फ्लाइओभर मात्रै बनाउन बाँकी छ । हालसम्म फ्लाइओभरको ५ वटा सबस्ट्रक्चर निर्माण सम्पन्न भइसकेको छ भने सुपर स्ट्रक्चर निर्माण पनि धमाधम भइरहेको छ । फ्लाइओभर निर्माण ७० प्रतिशत सम्पन्न भएको छ । त्यस्तै, फ्लाइओभर निर्माणका लागि आवश्यक जग्गामध्ये ९५ प्रतिशत अधिग्रहण गरिसकिएको आयोजनाले जनाएको छ ।
आयोजना अन्तर्गत निर्माण गर्नुपर्ने १२ वटा संरचनामध्ये ११ वटा संरचनाको निर्माण पूरा भइसकेको छ । आयोजना अन्तर्गत ३ वटा अण्डर पास, ४ वटा कल्भर्ट, ३ वटा पुल र एउटा ओभरपास निर्माण सम्पन्न भइसकेको छ ।
बलम्बुदेखि सुरुङमार्ग प्रवेश गर्ने मुख टुटिपाखासम्म २.३०७ किमी दुई लेन सडक कालोपत्र अन्तिम चरणमा पुगेको छ । त्यसैगरी, धादिङको सिस्नेखोलातर्फ ७२५ मिटरमध्ये ४५० मिटर पहुँच मार्ग निर्माण भइसकेको छ ।
आयोजनामा पर्ने जग्गाको केही कित्ताको मुआब्जा विवाद, घर चर्किएको समस्या, रोड सर्भिस सेन्टर (आरएसएस) निर्माण लगायत केही चुनौती बाँकी रहेका छन् ।
सुरुङमार्ग संचालनमा आउन अझै करिब १ वर्ष लाग्न्े जनाइएको छ । यद्यपि, आयोजनाको काम सम्पन्न नभए पनि गत असोज १३ गते भने आपतकालीन रुपमा संचालनमा ल्याइएको थियो । झ्याप्लेखोलामा पहिरो गएर सडक अबरुद्ध भएपछि रोकिएका सवारीसधानलाई सुरुङमार्ग हुँदै पठाइएको थियो ।
आयोजनाका लागि पछिल्लो समय १८ महिना समय थप गरिएकोमा थप गरिएको १० महिना अझै बाँकी रहेको छ । उक्त अवधिमा आयोजना सम्पन्न हुने विश्वास लिइएको छ ।
यो सुरुङमार्ग निर्माणको ठेक्का जापानी कम्पनी हाज्मा एन्डो कर्पोरेसनले पाएको छ । २२ अर्ब रुपैयाँमा ठेक्का लागेको यो आयोजनामा साढे १६ अर्ब रुपैयाँ जापान सरकारले ऋण सहयोग गरेको छ । बाँकी ६ अर्ब रुपैयाँ नेपाल सरकारले लगानी गरेको छ ।
सवारीसाधन गुड्ने यो नेपालकै पहिलो सुरुङमार्ग हो । सुरुङ सञ्चालनमा आएपछि काठमाडौंको थानकोटबाट ३ मिनेटमै धादिङको सिस्नेखोला पुगिने छ । आयोजना अन्तर्गत एउटा मुख्य र अर्को आपतकालीन सुरुङ रहेका छन् । मुख्य सुरुङमा केही भवितव्य परिहालेमा आपतकालीन सुरुङबाट उद्धार गर्न सकिन्छ । आपतकालीन र मुख्य सुरुङ जोड्न ७ वटा क्रस प्यासेज निर्माण गरिएको छ ।
४२ महिनामा निर्माण सक्नेगरी २०७६ कात्तिक ४ गते शिलान्यास गरिएको थियो । सम्झौता अनुसार सुरुङमार्गको काम २०८० वैशाखामा सम्पन्न हुनुपथ्र्यो । सो समयमा नसकिएपछि कोभिडको कारण ढिलाइ भएकोभन्दै ३ महिना (२०८० साउन ४ गतेसम्म) म्याद थप गरिएको थियो ।
सो अवधिमा पनि काममा प्रगति नदेखिएपछि दोस्रो पटक २०८१ वैशाख १३ सम्म म्याद थपिएको थियो । सो अवधिमा पनि काम नसकिएपछि फेरि १८ महिना म्याद थपिएको छ ।
