काठमाडौं । काठमाडौं-हेटौंडा जोड्ने सबै सडक संचालनमा आएका छन् । संघीय राजधानी काठमाडौंलाई हेटौंडा जोड्ने सबैभन्दा छोटो दूरीको कान्ति लोकपथ पनि आजदेखि संचालनमा आएको हो ।
अरु सडक यसअघि नै संचालनमा आएका थिए । सोमबार मध्यरातसम्म पहिरो हटाएर कान्ति लोकपथ संचालनमा ल्याइएको हो ।
सडकमा थुप्रिएको पहिरो हटाइएको छ भने बागमती नदीमा ह्युम पाइपको प्रयोग गरिएको छ । यससँगै काठमडौं- हेटौंडा जोड्ने सबै सडक संचालनमा आएका छन् ।
कुलेखानी-फाखेल-फर्पिङ र कुलेखानी-सिस्नेरी-दक्षिणकाली सडकखण्ड आइतबार दिउँसोदेखि संचालनमा आएका थिए ।
काठमाडौं-मुग्लिन हुँदै हेटौंडा जाने सडक भने असोज १४ गतेदेखि नै संचालनमा आएको थियो ।
असोज १० देखि १२ गते परेको अविल वर्षासँगै आएको बाढी र पहिरोले यी सडकखण्डहरू पूर्ण रूपमा अवरुद्ध भएका थिए।
