काठमाडौं । नेपाली बजारमा सुनको मूल्यले लगातार पाँचौं दिन नयाँ रेकर्ड बनाएको छ । यससाता आइतबारदेखि लगातार नयाँ रेकर्ड बनाउँदै आएको सुनको मूल्यले आज पनि नयाँ कीर्तिमान बनाएको हो ।
नेपाल सुनचाँदी व्यवसायी महासंघका अनुसार बिहीबार छापावाल सुनको भाउ प्रतितोला ३०० रुपैयाँले बढेर १ लाख ६० हजार ७०० रुपैयाँ पुगेको छ ।
यो नेपाली बजारमा अहिलेसम्मकै महँगो हो । यसअघि बुधबार सुनको भाउ प्रतितोला १ लाख ६० हजार ४०० रुपैयाँ पुगेको थियो।
अन्तर्राष्ट्रिय बजारमा सुनको भाउ बढेसँगै नेपाली बजारमा पनि आकाशिएको हो । अमेरिकी केन्द्री बैंकले ब्याजदर कटौती गरेसँगै लगानीकर्ता सुनमा आकर्षित हुँदा मूल्य आकाशिएको हो । आज अन्तर्राष्ट्रिय बजारमा भने सुन प्रतिऔंस २ हजार ६७५ अमेरिकी डलरमा कारोबार भइरहेको छ ।
यस्तै, आज चाँदीको मूल्य प्रतितोला ४० रुपैयाँ बढेर १९५५ रुपैयाँमा कारोबार भइरहेको छ ।
