काठमाडौं । सेयर बजारमा लगातार तेस्रो दिन गिरावट आएको छ । दिनभरमा ५३ अंकको उतरचढाव आएको नेप्से अन्त्यमा ४ अंकले घटेर बन्द भएको हो ।
यस साता तीन कारोबार दिनमै नेप्से १११ अंकले घटेको छ । बुधबार नेप्से परिसूचक ४ अंकले घटेर २५७६.७६ बिन्दुमा आइपुगेको छ । आज ३२० कम्पनीको १ करोड ३९ लाख ५२ हजार १२१ कित्ता सेयर किनबेच भएको छ ।
सूचकसँगै आज कारोबार रकममा पनि गिरावट आएको छ । अघिल्लो दिनको तुलनामा कारोबार रकम १ अर्ब ७० करोड रुपैयाँले घटेर ५ अर्ब ६६ करोड रुपैयाँमा सीमित भएको छ । यो दुई महिना यताकै कम हो ।
आज कारोबारमा आएका १३ ओटा समूहमध्ये बैंकिङ र निर्जीवन बीमा बाहेक अरु सबै समूहको परिसूचक राताम्मे भएको छ । फाइनान्स समूहको परिसूचक सर्वाधिक २.६८ प्रतिशतले घटेको छ ।
आज सीईडीबी हाइड्रोपावरको सर्वाधिक २० करोड ५८ लाख रुपैयाँको सेयर किनबेच भएको छ । त्यस्तै, नेपाल फाइनान्सको १६ करोड ९८ लाख रुपैयाँको कारोबार भएको छ ।
आज कारोबारमा आएका मध्ये ७४ कम्पनीको सेयर मूल्य बढेको छ भने १६३ कम्पनीको घटेको छ ।
आज कालिका लघुवित्तका सेयरधनीले सर्वाधिक ८.०८ प्रतिशत कमाएका छन् भने गुडविल फाइनान्सका सेयरधनीले ६.६६ प्रतिशत गुमाएका छन् ।
