काठमाडौं । नेपाली बजारमा सुनको मूल्यले हालसम्मकै महँगोको रेकर्ड बनाएको छ । पछिल्लो समय हप्तैपिच्छे जस्तो नयाँ रेकर्ड बनाउँदै आएको सुनको मूल्यले आज फेरि नयाँ कीर्तिमान बनाएको हो ।
नेपाल सुनचाँदी व्यवसायी महासंघका अनुसार बिहीबार छापावाल सुनको भाउ प्रतितोला १ हजार रुपैयाँले बढेर १ लाख ५३ हजार ४०० रुपैयाँ पुगेको छ ।
यो नेपाली बजारमा अहिलेसम्मकै महँगो हो । यसअघि भदौ १३ गते सुनको भाउ प्रतितोला १ लाख ५३ हजार २०० रुपैयाँ पुगेको थियो।
अन्तर्राष्ट्रिय बजारमा सुनको भाउ बढेसँगै नेपाली बजारमा पनि आकाशिएको हो । आज अन्तर्राष्ट्रिय बजारमा भने सुन प्रतिऔंस २ हजार ५१६ अमेरिकी डलरमा कारोबार भइरहेको छ ।
यस्तै, आज चाँदीको मूल्य भने प्रतितोला १५ रुपैयाँ घटेर १७८० रुपैयाँमा कारोबार भइरहेको छ ।
