वीरगञ्ज । मुलुकका सात प्रदेशमध्ये विद्युत् चुहावट हुने प्रदेशमाकर्णाली प्रदेश पहिलो स्थानमा छ । नेपाल विद्युत् प्राधिकरणले सार्वजनिक गरेको आर्थिक वर्ष २०८०/८१ को तथ्याङ्कअनुसार कर्णाली प्रदेशमा विद्युत् चुहावट २१.७९ प्रतिशत रहेको छ ।
त्यस्तै, विद्युत् चुहावट हुनेमा मधेस प्रदेश दोस्रो स्थानमा रहेको छ । मधेस प्रदेशमा विद्युत् चुहावट १५.२९ प्रतिशत रहेको छ ।
नेपाल विद्युत् प्राधिकरण मधेस प्रदेश प्रादेशिक कार्यालय जनकपुरका प्रमुख मुनिन्द्र ठाकुरले सातै प्रदेशमध्ये मधेस प्रदेश विद्युत् चुहावटमा दोस्रो स्थानमा परेको बताए ।
‘‘सातवटै प्रदेशमा हुने विद्युत् चुहावटमध्ये सबैभन्दा धेरै कर्णाली प्रदेशमा हुने गरेको छ । कर्णालीमा हुने विद्युत् चुहावट प्राविधिक कारणले भएको हो,’ उनले भने, ‘मधेस प्रदेश दोस्रो धेरै विद्युत् चुहावट हुने स्थानमा पर्नुको कारण गाउँगाउँमा लुकीछिपी विद्युत् चोरी गर्ने प्रवृत्ति देखिएको छ ।’
प्रादेशिक कार्यालय प्रमुख ठाकुरले मधेस प्रदेशमा सर्वसाधारणले विद्युत्को पोलबाट सोझै हुकिङ गरेर, मिटरबाट र सिँचाइका लागि जडान गरेको लाइनबाट धेरै विद्युत् चोरी हुने गरेको बताए ।
‘हामीले गत आवमा मात्रै विद्युत् चुहावटमा संलग्न २ हजार ६५६ जनालाई समातेर कारबाही गरेका छौँ,’ उनले भने, ‘‘जनचेतनाको अभावले पनि मधेस प्रदेशमा विद्युत् चुहावटका घटना धेरै हुने गरेका छन् ।’
मधेस प्रदेशमा प्राधिकरणका २३ वटा वितरण कार्यालय छन् । प्राधिकरण मधेस प्रदेश प्रादेशिक कार्यालय जनकपुरका अनुसार मधेस प्रदेशमा आव २०७७/७८ मा विद्युत् चुहावट १६.५४ प्रतिशत रहेको थियो । आव २०७८/७९ मा भने १४.१७ प्रतिशतमा झरेको थियो ।
तर, आव २०७९/८० मा विद्युत् चुहावट १३.७९ प्रतिशतमा सीमित भएको थियो । त्यस्तै आव २०८०/८१ मा भने विद्युत् चुहावट केही प्रतिशत बढेर १५.२९ प्रतिशतमा पुगेको छ । प्राधिकरणका अनुसार कोशी प्रदेशमा विद्युत् चुहावट ९.८७ प्रतिशत रहेको छ ।
बाग्मती प्रदेशमा विद्युत् चुहावट ५.६० प्रतिशत चुहावट रहेको छ । त्यस्तै गण्डकी प्रदेशमा विद्युत् चुहावट ७.६७, लुम्बिनी प्रदेशमा ८.५९ र सुदृरपश्चिम प्रदेशमा ११.५० प्रतिशत रहेको छ ।
