काठमाडौं । अन्तर्राष्ट्रिय बजारमा कच्चा तेलको भाउ आकाशिएको छ । विश्वका ठूला तेल उत्पादक देशहरू तेल उत्पादनभन्दा पनि मौज्दात घटाउनतिर सक्रिय भएपछि मूल्य बढ्न थालेको हो ।
अन्तर्राष्ट्रिय सञ्चार माध्यम आयल प्राइसले अमेरिकासहित विश्वव्यापी मौज्दात केही घटेसँगै मूल्यमा चाप पररेको जनाएको छ । अमेरिकी ऊर्जा सूचना प्रशासनका अनुसार पछिल्लो दुई महिनामै तेलको मौज्दात ३ करोड ४६ लाख ब्यारेल घटेको छ ।
पछिल्लो ५ दिनमै कच्चा तेलको भाउ औसत ५ प्रतिशतले बढेको छ । सोमबार विश्व बेन्चमार्क ब्रेन्ट क्रुड आयलको भाउ १ प्रतिशतले बढेर प्रतिब्यारेल ७९.६७ डलर पुगेको छ । ५ दिन अघि (अगस्ट २१) ब्रेन्टको भाउ प्रतिब्यारेल ७६ डलर थियो ।
यसैगरी, आज ओपेक बेन्चमार्क डब्ल्यूटीआइ क्रुड आयलको भाउ ७५.५० डलर पुगेको छ । ५ दिन अघि यसको भाउ प्रतिब्यारेल ७१ डलर थियो । यस्तै, मुर्बान क्रुड आयलको भाउ प्रतिब्यारेल ७९ डलर पुगेको छ ।
अन्तर्राष्ट्रिय बजारमा कच्चा तेलको मूल्य बढेसँगै त्यसको प्रत्यक्ष असर नेपालमा पनि पर्छ । नेपालले अहिले सिधै अन्तर्राष्ट्रिय बजारबाट तेल खरिद नगरी भारतसँग खरिद गरेर ल्याउने गरेको छ । विश्व बजारमा कच्चा तेलको भाउ बढ्दा भारतमा पनि बढ्ने हुनाले त्यसको प्रभाव नेपालमा पनि पर्छ ।
नेपाल आयल निगमले २०८० साउन १ गतेदेखि स्वचालित मूल्य प्रणाली लागू गरेको छ । सो अनुसार भारतबाट भाउ बढेर आए नेपालमा पनि बढ्ने र घटेर आए घट्ने गर्छ । अहिले विश्व बजारमा भाउ बढिरहेकाले आगामी दिनमा नेपालमा पनि तेलको भाउ बढ्ने सम्भावना देखिन्छ ।
