काठमाडौं । भदौ महिनाका लागि १३ वटा वाणिज्य बैंकहरूले मुद्दती निक्षेपको ब्याजदर घटाएका छन् । त्यस्तै, प्राइम कमर्शियल बैंकले बढाएको छ भने ६ वटाले साउनकै ब्याजदर स्थिर राखेका छन् ।
गत आर्थिक वर्षको कात्तिकदेखि लगातार महिनैपिच्छे निक्षेपको ब्याजदर घटाउँदै आएका बैंकहरूले भदौमा पनि थप घटाएका हुन् । बैंकिङ प्रणालीमा पर्याप्त लगानी योग्य रकम (तरलता) थुप्रिए पनि कर्जाको माग नबढेपछि बैंकहरूले थप ब्याजदर घटाएका हुन् ।
बैंकिङ प्रणालीमा अहिले झण्डै ७ खर्ब रुपैयाँ तरलता छ । तर, कर्जा लगानी हुन नसकेपछि बैंकहरूले स्थायी निक्षेप सुविधा प्रयोग गर्दै ३ प्रतिशत ब्याजदरमा राष्ट्र बैंकमा राखिरहेका छन् । यस्तो अवस्थामा बैंकहरूले आफ्नो लागत घटाउन पनि निक्षेपको ब्याजदर घटाएका हुन् ।
साउनको तुलनामा भदौमा वाणिज्य बैंकहरूले औसतमा व्यक्तिगत निक्षेपतर्फ ०.२१ प्रतिशत बिन्दु र संस्थागततर्फ ०.२२ प्रतिशत बिन्दुले घटाएका छन् । साउनमा व्यक्तिगत मुद्दतीको औसत ब्याजदर ६.७४ प्रतिशत रहेकोमा भदौमा घटेर ६.५३ प्रतिशतमा झरेको छ । त्यस्तै, संस्थागत मुद्दतीको औसत ब्याजदर साउनमा ५.४८ प्रतिशत रहेकोमा भदौमा घटेर ५.२६ प्रतिशतमा झरेको छ ।
भदौका लागि १३ वाणिज्य बैंकले निक्षेपको ब्याजदर घटाएका छन् । जसमा सरकारी स्वामित्वको नेपाल बैंकले सबैभन्दा धेरै व्यक्तिगततर्फ १ प्रतिशत बिन्दु र संस्थागततर्फ ०.२५ प्रतिशत बिन्दुले घटाएको छ । त्यस्तै, प्रभु ०.९ प्रतितश बिन्दु, इन्भेष्टमेन्ट मेगा र हिमालयनले व्यक्तिगत तर्फ ०.५ प्रतिशत बिन्दुले घटाएका छन् ।
त्यस्तै, नेपाल एसबीआइ, एनएमबी, एनआइसी एशिया, राष्ट्रिय वाणिज्य, सानिमा, एभरेष्ट, कृषि विकास, सिद्धार्थ र सिटिजन्स बैंकले पनि निक्षेपको ब्याजदर घटाएका छन् ।
भदौमा प्राइम कमर्शियल बैंकले व्यक्तिगत तर्फ ०.२५ प्रतिशत बिन्दुले ब्याजदर बढाएको छ । प्राइमले संस्थागततर्फ भने ०.७५ प्रतिशत बिन्दुले घटाएको छ ।
भदौमा माछापुच्छे, स्ट्याण्डर्ड चार्टर्ड, नबिल, कुमारी, लक्ष्मी सनराइज र ग्लोबल आइएमईले भने साउनकै ब्याजदरलाई निरन्तरता दिएका छन् ।
भदौमा वाणिज्य बैंकहरू बीच निक्षेपको ब्याजदर २.१६ प्रतिशत बिन्दुसम्म फरक भएको छ । एनएमबी र एनआइसीले सर्वाधिक ७.४१ प्रतिशत ब्याजदर दिने भएका छन् भने नेपालले सबैभन्दा कम ५.२५ प्रतिशत ब्याज दिने भएको छ । वाणिज्य बैंकहरूले ब्याजदर घटाएको यो लगातार एघारौं महिना हो ।
बैंकिङ प्रणालीमा अधिक तरलता हुँदाहुँदै पनि गत असोजमा बैंकहरूले अर्को बैंकमा रहेको निक्षेप खोस्न ब्याजदर बढाएका थिए । तर, महँगो ब्याजमा उठाएको निक्षेप कर्जा लगानी गर्न नसकेपछि बैंकको उल्टो लागत बढेको थियो । अर्थतन्त्रमा आएको संकुचनका कारण कर्जाको माग बढ्न नसकेपछि बैंकहरूले बाध्य भएर ब्याजदर घटाउन थालेका हुन् ।
२०८० साउनदेखि नेपाल बैंकर्स संघले ब्याजदरमा रहेको भद्र सहमती तोडेको थियो । त्यस यता बैंकहरूलाई आफूखुसी स्वतन्त्र रुपमा निक्षेपको ब्याजदर तोक्दै आएका छन् । साउनअघि संघले ब्यादरमा हस्तक्षेप गर्दा सबै बैंकको एउटै ब्याजदर हुने गरेको थियो ।
