काठमाडौं । निर्जीवन बीमा कम्पनीहरूको खुद नाफामा उल्लेख्य वृद्धि भएको छ । निर्जीवन बीमा कम्पनीहरूले सार्वजनिक गरेको गत आर्थिक वर्ष २०८०/८१ को चौथो त्रैमासको अपरिष्कृत वित्तीय विवरण अनुसार खुद नाफा औसतमा ५२.८१ प्रतिशतले बढेको छ ।
गत असार मसान्तसम्म १४ निर्जीवन बीमा कम्पनीले कुल ७ अर्ब ४३ करोड १३ लाख रुपैयाँ खुद नाफा कमाएका छन् । यो अघिल्लो आर्थिक वर्ष २०७९/८० को तुलनामा २ अर्ब करोड रुपैयाँले धेरै हो । अघिल्लो वर्ष निर्जीवन बीमा कम्पनीले कुल ४ अर्ब ८६ करोड ३१ लाख रुपैयाँ खुद नाफा कमाएका थिए ।
गत वर्ष औसतमा एउटा कम्पनीले ५३ करोड ८ लाख रुपैयाँ नाफा कमाएका छन् । अघिल्लो वर्ष औसत नाफा ३४ करोड ७३ रुपैयाँ थियो ।
पछिल्लो समय अर्थतन्त्र क्रमशः चलायमान हुँदै जाँदा बीमा कम्पनीहरुको व्यवसायमा सुधार आउँदा नाफामा उल्लेख्य सुधार आएको हो ।
समीक्षा अवधिमा बीमा कम्पनीहरूको खुद बीमा शुल्क संकलन र कर्जा तथा लगानी आयबाट हुने आम्दानी बढ्दा समग्रमा नाफा बढ्न पुगेको हो । साथै, गत वर्षको सुरुआति महिनामा निक्षेपको ब्याजदर बढेकाले बीमा कम्पनीहरूको नाफामा उच्च वृद्धि भएको हो ।
गत वर्षको असोजसम्म तरलता अभावका कारण बैंकहरूले निक्षेपको ब्याजदर १२ प्रतिशतसम्म पुर्याएका थिए । बीमा कम्पनीले प्रिमियमको ठूलो रकम निक्षेपमा राख्ने भएकाले ब्याजदर बढ्दा उनीहरूलाई फाइदा पुगेको हो ।
१२ कम्पनीको नाफा बढ्यो, २ वटाको मात्रै घट्यो
समीक्षा अवधिमा १४ मध्ये १२ निर्जीवन बीमा कम्पनीको नाफा बढेको छ भने दुई वटाको मात्र घटेको छ । अघिल्लो वर्षको तुलनामा राष्ट्रिय बीमा कम्पनीको नाफा सबैभन्दा धेरै १८.८ प्रतितश र नेको इन्स्योरेन्सको २.७४ प्रतिशतले घटेको हो ।
यस अवधिमा ४ कम्पनीको नाफा दोब्बरभन्दा धेरैले बढेको छ । जसमा आइजीआइ प्रुडेन्सियलको सर्वाधिक १५६.६७ प्रतिशतले बढेको छ । त्यस्तै, शिखरको १२६.८७ प्रतिशत, प्रभु ११८.१३ प्रतिशत र युनाइटेड अजोडको ११८.११ प्रतिशतले बढेको छ ।
समीक्षा अवधिमा मर्ज भएका अधिकांश बीमा कम्पनीको नाफा बढेको छ । बैंकहरूमा मर्जरको सिनर्जी नदेखिए पनि बीमा कम्पनीमा भने सिनर्जी देखिएको छ ।
धेरै कमाउने नेपाल, शिखरलाई ८ कम्पनीले उछिने
समीक्षा अवधिमा नेपाल इन्स्योरेन्स सबैभन्दा धेरै नाफा कमाउने निर्जीवन बीमा कम्पनी बनेको छ । अघिल्लो वर्षको तुलनामा ८७.७९ प्रतिशतले नाफा बढाउन सफल नेपालले ७९ करोड ६ लाख रुपैयाँ नाफा कमाएको छ ।
त्यसैगरी, साविकको सिद्धार्थ र प्रिमियर मर्ज भई बनेको सिद्धार्थ प्रिमियरले ६९ करोड २३ लाख रुपैयाँ नाफा कमाएको छ । यसले अघिल्लो वर्षको तुलनामा खुद नाफा ८२.५२ प्रतिशतले बढाएको छ ।
गत वर्ष नेकोले ६८ करोड ५७ लाख, हिमालयन एभरेष्टले ६६ करोड ७९ लाख, राष्ट्रिय बीमा कम्पनीले ६२ करोड ७३ लाख, आइजीआई पु्रडेन्सियल ६१ करोड र सगरमाथा लुम्बिनी इन्स्योरेन्सले ६० करोड ८९ लाख रुपैयाँ नाफा कमाएको छ ।
त्यसैगरी, आरेन्टलले ५९ करोड ६१ लाख, शिखरले ५१ करोड ३० लाख, प्रभुले ४९ करोड ८ लाख, युनाइटेड अजोड ३८ करोड ५२ लाख, सानिमा जीआइसी ३३ करोड ७ लाख र नेशनलले २६ करोड ६७ करोड रुपैयाँ नाफा कमाएको छ ।
समीक्षा अवधिमा एनएलजी इन्स्योरेन्सले सबैभन्दा कम २५ करोड ३३ लाख रुपैयाँ नाफा कमाएको छ ।
