काठमाडौं । फाइनान्स कम्पनीहरूको खुद नाफामा उल्लेख्य सुधार आएको छ । अघिल्लो आव २०७९/८० को तुलनामा गत आर्थिक वर्ष २०८०/८१ मा फाइनान्स कम्पनीहरूको नाफा ४५४.९० प्रतिशतले बढेको हो ।
नेप्सेमा सूचीकृत १५ मध्ये हालसम्म १४ कम्पनीले गत आवको अपरिष्कृत वित्तीय विवरण सार्वजनिक गरेका छन् । गत असार मसान्तसम्म १४ फाइनान्स कम्पनीले कुल ४४ करोड ६४ लाख ४७ हजार रुपैयाँ खुद नाफा कमाएका छन् ।
यो अघिल्लो वर्षको तुलनामा ३६ करोड ५९ लाख रुपैयाँ धेरै हो । अघिल्लो आव २०७९/८० मा फाइनान्सहरूले जम्मा ८ करोड ४ लाख ५५ हजार रुपैयाँ मात्र नाफा कमाएका छन् ।
गत वर्ष फाइनान्स कम्पनीहरूको खुद ब्याज आम्दानी घटे पनि इम्पेयरमेन्ट चार्ज घट्दा नाफामा उल्लेख् सुधार देखिएको हो । अर्थतन्त्रमा आएको शिथिलताका कारण व्यवसाय विस्तार गर्न नसक्दा फाइनान्स कम्पनीहरूको खुल ब्याज आम्दानी ७.१२ प्रतिशतले घटेको छ । अघिल्लो आवमा कुल ३ अर्ब ९४ करोड खुद ब्याज आम्दानी गरेका फाइनान्सले गत वर्ष ३ अर्ब ६६ करोड रुपैयाँमा सीमित भएका हुन् ।
गत आवमा १४ मध्ये ६ वटा फाइनान्सको नाफामा सुधार आएको छ भने ८ वटाको झन् घटेको छ । गत वर्ष १० वटा फाइनान्स नाफामा छन् भने ४ वटा घाटामा छन् ।
कुनले कति कमाए नाफा ?
गत वर्ष जम्मा ४ वटा फाइनान्सले मात्र १० करोड रुपैयाँ माथि नाफा कमाउन सफल भएका छन् । जसमा मञ्जुश्री फाइनान्सले सबैभन्दा धेरै २६ करोड ५८ लाख रुपैयाँ नाफा कमाएको छ । अघिल्लो वर्षको तुलनामा मञ्जुश्रीले नाफा ७.६२ प्रतिशतले बढाउन सफल भएको हो ।
त्यस्तै, गुडविल फाइनान्सले १४ करोड ८४ लाख, आइसीएफसीले ११ करोड ८६ लाख र गोर्खा फाइनानसले १० करोड ८९ लाख रुपैयाँ नाफा कमाएका छन् ।
श्री इन्भेष्टमेन्टले ६ करोड ६८ लाख रुपैयाँ नाफा कमाएको छ भने अरुको ३ करोडभन्दा कम छ । जसमा रिलायन्स २ करोड ८९ लाख, मल्टीपर्पस २ करोड ३ लाख, नेपाल १ करोड ८१ लाख, गुह्येश्वरी मर्चेन्ट १ करोड ५४ लाख र बेस्ट फाइनान्सले ४ लाख ७७ रुपैयाँ नाफा कमाएको छ ।
गत आवमा ४ फाइनान्स कम्पनी भने घाटामा छन् । जसमा जानकी फाइनान्स सबैभन्दा धेरै १३ करोड ७१ लाख रुपैयाँ नोक्सानीमा छ । त्यस्तै, पोखरा फाइनान्स १० करोड ६४ लाख, सेन्ट्रल ६ करोड ३८ लाख र प्रोग्रेसिभ फाइनानस ३ करोड ८० लाख रुपैयाँ घाटामा छन् ।
४ कम्पनीले मात्रै लाभांश दिन सक्ने
गत वर्ष फाइनान्सहरूको नाफा साढे ५ गुणाले बढे पनि अधिकांशको रिटेन्ड अर्निङ ऋणात्मक छ । १४ मध्ये ४ कम्पनीको मात्रै रिटेन्ड अर्निङ धनात्मक छ भने १० वटाको ऋणात्मक छ ।
गत आवको नाफाबाट जम्मा ४ वटा फाइनान्सले मात्र सेयरधनीलाई लाभांश दिनसक्ने अवस्था छ । जसमा मञ्जुश्रीको वितरणयोग्य नाफा सबैभन्दा धेरै १० करोड ७६ लाख रुपैयाँ छ । यसबाट कम्पनीले ७.७३ प्रतिशत लाभांश बाँड्न सक्छ ।
त्यस्तै, आइसीएफसीको वितरण योग्य नाफा ४ करोड ७२ लाख, गुहेश्वरी फाइनान्सको २ करोड ८८ लाख र श्री इन्भेष्टमेन्टको २ करोड ३८ लाख रुपैयाँ रहेको छ । यी फाइनान्सले सेयरधनीलाई ५ प्रतिशत पनि लाभांश दिन सक्दैनन् ।
आइसीएफसीको ३.९८ प्रतिशत, गुह्येश्वरीको २.८४ प्रतिशत र श्री इन्भेष्टमेन्टको लाभांश क्षमता २.४२ प्रतिशत रहेको छ ।
