काठमाडौं । गुराँस लघुवित्त वित्तीय संस्थाको खुद नाफामा उछाल आएको छ । लघुवित्तले आइतबार सार्वजनिक गरेको गत आर्थिक वर्ष २०८०/८१ को चौथो त्रैमासको अपरिष्कृत वित्तीय विवरण अनुसार खुद नाफा १४४८.५३ प्रतिशतले बढेको हो ।
लघुवित्तले गत आवको असार मसान्तसम्ममा २ करोड ५९ लाख रुपैयाँ कमाएको छ । यो अघिल्लो आव २०७९/८० को तुलनामा २ करोड ४३ लाख रुपैयाँ धेरै हो । लघुवित्तले अघिल्लो वर्ष असारसम्म १६ लाख ७६ हजारु रुपैयाँ मात्रै नाफा कमाएको थियो ।
समीक्षा अवधिमा लघुवित्तको खुद ब्याज आम्दानी, सञ्चालन नाफा बढ्दा र खराब कर्जा घट्दा नाफामा छलाङ मारेको हो ।
समीक्षा अवधिमा लघुवित्तको खुद ब्याज आम्दानी ४७.९४ प्रतिशतले बढेर ८ करोड २८ लाख रुपैयाँ पुगेको छ । त्यस्तै, संचालन मुनाफा १४१८.२४ प्रतिशतले बढेर ३ करोड ६० लाख रुपैयाँ पुगेको छ ।
समीक्षा अवधिमा लघुवित्तले ३४ करोड ९४ लाख रुपैयाँ निक्षेप र १ अर्ब १८ करोड रुपैयाँ सापटी लिई कुल १ अर्ब ६८ करोड रुपैयाँ ऋण लगानी गरेको छ ।
हाल १० करोड १४ लाख रुपैयाँ चुक्ता पूँजी रहेको लघुवित्तको जगेडा कोषमा ४ करोड ७१ लाख रुपैयाँ संचित छ ।
नाफा बढेसँगै लघुवित्तको प्रतिसेयर आम्दानीमा पनि उल्लेख्य सुधार आएको छ । समीक्षा अवधिमा लघुवित्तको प्रतिसेयर आम्दानी १.६५ रुपैयाँबाट बढेर २५.६१ रुपैयाँ पुगेको छ ।
असारसम्म लघुवित्तको प्रतिसेयर नेटवर्थ १४६.५२ रुपैयाँ छ । यस अवधिमा लघुवित्तको खराब कर्जा २.६९ प्रतिशतबाट घटेर २.४६ प्रतिशतमा झरेको छ ।
