काठमाडौं । रिलायन्स स्पिनिङ मिल्सकाे प्राथमिक साधरण सेयर (आइपीओ) निष्काशन प्रक्रिया रोकिएको छ ।
संघीय संसदको सार्वजनिक लेखा समितिको पत्रपछि नेपाल धितोपत्र बोर्डले कम्पनीको आइपीओ निष्काशन प्रक्रिया स्थगन गरेको हो ।
कम्पनीले भोलिदेखि वैदेशिक रोजगारीमा गएका नेपालीका लागि प्रतिकित्ता ८२०.८० रुपैयाँ दरले १ लाख १५ हजार ५९६ कित्ता आइपीओ निष्काशन गर्दै थियो । कम्पनीको आइपीओ महँगो र शंकास्पद भएको भन्दै चौतर्फी विरोध भएको भइरहेको थियो ।
यसैबीच, मंगलबार लेखा समितिले रिलायन्सको वित्तीय विवरण र आइपीओ निष्काशनबारे जवाफ मागेपछि बोर्ड सञ्चालक समितिले हाललाई रिलायन्सको आइपीओ निष्काशन रोक्ने निर्णय गरेको हो ।
लेखाले रिलायन्सको आइपीओमा ५ वटा प्रश्न उठाउँदै बोर्डलाई ७ दिनभित्र जवाफ पेश गर्न पत्र काटेको थियो । त्यसको भोलिपल्टै बोर्डले आइपीओ निष्काशन प्रक्रिया जारी गरेको हो ।
कम्पनीले आइपीओ स्वीकृति पाउनु अघि र हालै सार्वजनिक गरेको वित्तीय विवरणमा ‘आकाश-पाताल’को फरक परेको छ । शंकास्पद वित्तीय विवरण देखाइ जनतालाई महँगोमा सेयर भीडाउन खोजेको भन्दै समितिले जवाफ माग्दै पत्र काटेको हो ।
‘गत आर्थिक वर्षमा प्रतिसेयर आम्दानी ५४.३४ रुपैयाँ रहेको कम्पनीले उल्लेख गरेको थियो, तर अहिले एक वर्ष नपुग्दै उक्त आम्दानी घटेर २.०८ रुपैयाँमा सीमित भएको छ । यसअघि वित्तीय विवरण तयार गर्दा म्यानुपुलेसन भएको अनुमान गर्न किन नसकिने ?,’ लेखा समितिको प्रश्न छ ।
कम्पनीले आइपीओ स्वीकृत लिनुअघि वित्तीय विवरण आकर्षक बनाउन नेपाल विद्युत् प्राधिकरणलाई तिर्नुपर्ने दायित्व समेत देखाएको थिएन । कम्पनीले प्राधिकरणलाई ७५ करोड ३६ लाख रुपैयाँ बक्यौता तिर्न बाँकी छ । महशुल नतिरेपछि प्राधिकरणले मंगलबारदेखि कम्पनीको बिजुली लाइन काटेको छ ।
त्यस्तै, समितिले बुक बिल्डिङका लागि बिड गर्न योग्य संस्थागत लगानीकर्ताको उक्त कम्पनी वा कम्पनीका सञ्चालकसँग स्वार्थ बाझिएको छ/छैन भनेर जवाफ माग गरेको छ ।
त्यसैगरी, संस्थागत लगानीकर्ताले कति मूल्यमा कति कित्ता सेयरका लागि आवेदन दिएका थिए भन्ने विवरण समेत मागेको छ ।संस्थागत लगानीकर्ताको कम्पनीको सेयर प्रतिकित्ता ९१२ रुपैयाँमा किनेका थिए ।
अब बोर्डले जवाफ पठाएपछि समितिले कम्पनीको आइपीओ प्रक्रिया बारे थप निर्णय गर्नेछ ।
