काठमाडौं । बजारमा उपभोग्य वस्तुको माग बढ्न थालेको देखिएको छ । पछिल्ला महिनाहरूमा अर्थतन्त्र क्रमशः चलायमान हुन थालेसँगै बजारमा वस्तुको पनि माग बढ्न थालेको हो ।
अहिले निर्माण सामग्री सँगसँगै अन्य उपभोग्य वस्तुको पनि माग बढ्न थालेको भन्सार विभागको तथ्यांकले देखाएको छ । निर्माण गतिविधि बढ्दा उद्योगहरूको कच्चा पद्धार्थ आयात बढेको छ ।
विभागले शुक्रबार सार्वजनिक गरेको तथ्यांक अनुसार जेठमा चालु वर्षकै धेरै वस्तु आयात भएको छ । जेठमा १ खर्ब ५० अर्ब ३४ करोड रुपैयाँ बराबरको विदेशी वस्तु आयात भएको छ । चालु आवको ११ महिनामा आयात भएको सबैभन्दा धेरै हो । यसअघि गत असोजमा १ खर्ब ४८ अर्बको वस्तु आयात भएको थियो ।
जेठमा वैशाखको तुलनामा १४ अर्ब ३६ करोड रुपैयाँ बढीको आयात भएको हो । वैशाखमा १ खर्ब ३५ अर्ब ९८ करोड रुपैयाँको १ खर्ब ३३ अर्ब रुपैयाँको वस्तु आयात भएको थियो ।
चालु वर्षमा मासिक औसतमा १ खर्ब ३२ अर्ब ९ करोड रुपैयाँको विदेशी वस्तु आयात हुँदै आएको छ । जेठमा औसतभन्दा १८ करोड रुपैयाँ रुपैयाँ बढीको वस्तु आयात भएको हो ।
विभागका अनुसार चालु आर्थिक वर्षको ११ महिना (साउन-जेठ)मा कुल १४ खर्ब ५३ अर्ब ७० करोड रुपैयाँको वस्तु आयात भएको छ । यद्यपि, गत वर्षको सोही अवधिको तुलनामा आयात १.४८ प्रतिशत अर्थात् २७ अर्ब अर्ब रुपैयाँले कम हो । गत वर्ष जेठसम्म १४ खर्ब ८० अर्ब रुपैयाँ बढीको विदेशी वस्तु आयात भएको थियो ।
चालु वर्षको असोजमा सबैभन्दा धेरै १ खर्ब ४८ अर्ब र कात्तिकमा सबैभन्दा कम १ खर्ब ५ अर्ब रुपैयाँको वस्तु आयात भएको थियो । त्यस्तै, साउनमा १ खर्ब २९ अर्ब, भदौ १ खर्ब ३० अर्ब, कात्तिकमा १ खर्ब ५ अर्ब, मंसिरमा १ खर्ब ३० अर्ब, पुसमा १ खर्ब २६ अर्ब, माघमा १ खर्ब २९ अर्ब, फागुनमा १ खर्ब ३३ रुपैयाँ, चैतमा १ खर्ब ३७ अर्ब र वैशाखमा १ खर्ब ३६ अर्बको सामान आयात भएको छ ।
जेठसम्म वस्तु आयातबापत लाग्ने भन्सार दस्तुरबाट सरकारले ३ खर्ब ८४ अर्ब रुपैयाँ आम्दानी छ । जेठमा मात्रै भन्सारबाट ४२ अर्ब राजस्व उठेको छ ।चालु आवमा औसतमा मासिम ३४ अर्ब भन्सार राजस्व संकलन हुँदै आएकोमा जेठमा औसतभन्दा ८ अर्ब रुपैयाँ बढेको हो ।
निर्यात सवा ४ अर्ब घट्यो
समीक्षा अवधिमा निर्यातमा पनि गिरावट आएको छ । गत वर्षको तुलनामा चालु आवको ११ महिनामा नेपालबाट हुने निर्यात ३.०१ प्रतिशतले घटेको छ ।
विभागका अनुसार चालु आवको जेठसम्म कुल १ खर्ब ३९ अर्ब २६ करोड रुपैयाँ सामान विदेशिएको छ । यो गत वर्षकोभन्दा ४ अर्ब ३२ करोड रुपैयाँ कम हो । गत वर्ष सोही अवधिमा १ खर्ब ४३ अर्ब ५८ करोड रुपैयाँको वस्तु नेपालबाट विदेशिएको थियो । यस वर्ष मासिक औसतमा १२ अर्ब ६३ करोड रुपैयाँको सामान निर्यात भएको छ ।
व्यापार घाटामा सुधार
गत वर्षको तुलनामा आयात घटेसँगै व्यापार घाटामा पनि सुधार आएको छ । समीक्षा अवधिमा व्यापार घाटा १.८४ प्रतिशतले घटेको छ । गत वर्ष जेठसम्म १३ खर्ब ३७ अर्ब व्यापार घाटा रहेकोमा चालु वर्षको सोही अवधिमा १३ खर्ब १४ अर्बमा सीमित भएको छ । गत वर्षकोभन्दा व्यापार घाटा २० अर्बले घटेको हो ।
चालु आवको ११ महिनामा कुल १५ खर्ब ९२ अर्ब रुपैयाँको वैदेशिक व्यापार भएको छ । यो गत वर्ष सोही अवधिकोभन्दा १.९५ प्रतिशत अर्थात् साढे ३१ अर्ब रुपैयाँ कम हो । गत वर्ष जेठसम्म १६ खर्ब २४ अर्ब रुपैयाँ बराबरको वैदेशिक व्यापार भएको थियो ।
