काठमाडौं । सेयर बजारमा लगातार दोहोरो अंकको गिरावट आएको छ । आइतबार १७ अंकले घटेको नेप्से आज सोभन्दा धेरै अंकलेले घटेको हो ।
मंगलबार नेप्से परिसूचक १८.७६ अंकले घटेर २०७६.४९ बिन्दुमा आइपुगेको छ । सूचकसँगै कारोबार रकममा पनि भारी गिरावट आएको छ । अघिल्लो दिनको तुलनामा कारोबार रकम १ अर्ब ४२ करोडले घटेर ४ अर्ब ५ करोड रुपैयाँ सीमित भएको छ ।
आज ३१८ कम्पनीको ९५ लाख ४४ हजार ७३४ कित्ता सेयर किनबेच भएको छ ।
कारोबारमा आएका १३ वटै समूहको परिसूचक राताम्मे भएको छ । बैंकिङ समूहको परिसूचक सर्वाधिक १.१६ प्रतिशतले घटेको छ ।
आज बरुण हाइड्रोपावरको सर्वाधिक कारोबार भएको छ । यसको ११ करोड २७ लाख रुपैयाँको ३ लाख ६२ हजार १२४ कित्ता सेयर किनबेच भएको छ ।
कारोबारमा आएका मध्ये ४० कम्पनीको मात्र सेयर मूल्य बढेको छ भने १९८ कम्पनीको घटेको छ ।
घट्दो बजारमा समाज लघुवित्तको सेयर मूल्यमा भने पोजेटिभ सर्किट लागेको छ । यसका सेयरधनीले ठ्याक्कै १० प्रतिशत कमाएका छन् ।
मनकामना स्मार्ट लघुवित्त र कुथेली बुखरी स्मल हाइड्रोपावरका सेयरधनीले ठ्याक्कै १० प्रतिशत गुमाएका छन् ।
