काठमाडौं । सेयर बजारमा करेक्शन आएको छ । गत साता ३४ अंकले बढेको नेप्से आज दोहोरो अंकले घटेको हो ।
आइतबार नेप्से परिसूचक १७.०४ अंकले घटेर २०९५.२५ बिन्दुमा आइपुगेको छ । सूचकमा गिरावट आए पनि कारोबार रकम भने उत्साहजनक रहेको छ ।
आज ३१२ कम्पनीको ५ अर्ब ४७ करोड रुपैयाँ बढीको १ करोड ३२ लाख २३ हजार ८८४ कित्ता सेयर किनबेच भएको छ ।
कारोबारमा आएका १३ वटा समूह मध्ये होट समूह बाहेक अरु सबैको परिसूचक राताम्मे भएको छ । माइक्रोफाइनान्स समूह सर्वाधिक १.७१ प्रतिशतले घटेको छ ।
आज पनि नेपाल फाइनान्सको सर्वाधिक कारोबार भएको छ । यसको ३० करोड ४० लाख रुपैयाँको ४ लाख ७९ हजार ९८७ कित्ता सेयर किनबेच भएको छ ।
कारोबारमा आएका मध्ये ६४ कम्पनीको मात्र सेयर मूल्य बढेको छ भने १७७ कम्पनीको घटेको छ ।
घट्दो बजारमा आज दुई कम्पनीको सेयर मूल्यमा भने पोजेटिभ सर्किट लागेको छ । नेपाल फाइनान्स र मनकामाना स्मार्ट लघुवित्तको सेयर मूल्य १० प्रतिशत बढेको छ ।
भगवती हाइड्रोपावरका सेयरधनीले भने सर्वाधिक १० प्रतिशत गुमाएका छन् ।
