काठमाडौं । सरकारले सात इन्टरनेट सेवाप्रदायकको लाइसेन्स खारेज गरेको छ ।
नेपाल दूरसञ्चार प्राधिकरण (एनटीए)ले एक सूचना जारी गर्दै तोकिएको समयावधिभित्र नवीकरण नगर्ने कम्पनीको लाइसेन्स रद्द भएको जानकारी गराएको हो ।
प्राधिकरणका अनुसार काठमाडौंको मिथिला डिजिटल नेपाल प्रालि, मोरङको वशिष्ठ केबल नेट प्रालि र इन्फो नेट टेक्नोलोजी प्रालि, जुम्लाको सिम्पल इन्टेलिजेन्ट टेक्नोलोजी प्रालि, झापाको एसिया नेट कम्युनिकेसन प्रालि, गुल्मीको फास्ट स्पिड लिंक नेटवर्क प्रालि र धनुषाको यस नेट प्रालिको लाइसेन्स खारेज भएको छ ।
यी ७ कम्पनीले दूरसञ्चार नियमावली, २०५४ को नियम १२ बमोजिम अनुमतिपत्र नवीकरण गर्न तोकिएको समयावधिभित्र अनुमतिपत्र नवीकरणवापतको दस्तुर बुझाएर अनुमतिपत्र नवीकरणको लागि निवेदन पेस नगरेकोले लाइसेन्स स्वतः खारेज भएको प्राधिकरणले जनाएको छ ।
