काठमाडौं । हिमालयन बैंकको झण्डै ५१ लाख कित्ता संस्थापक (प्रमोटर) सेयर लिलामीमा आएको छ ।
बैंकले विद्यमान ६ जना संस्थापक सेयरधनीको नाममा रहेको ५० लाख ९१ हजार ८१८ कित्ता संस्थापक सेयर लिलामीमा ल्याएको हो ।
बैंकका अनुसार म्युचुअल ट्रेडिङको नाममा रहको ५० लाख कित्ता, पुनप्रसाद सुवेदीको ४० हजार ९४३ कित्ता, स्वान इन्टरनेशनलको ३१ हजार २३७, सुप्रिना मास्के र शैलेश नाथ मास्केको समान ८ हजार ३५७ कित्ता र उपेन्द्र मान प्रधानको नाममा रहको २ हजार ९२४ कित्ता सेयर लिलामीमा ल्याइएको हो ।
उक्त सेयरमा हाललाई बैंकका विद्यमान संस्थापक सेयरधनीले मात्रै आवेदन दिन पाउने छन् । संस्थापक सेयरधनीले नकिनेमा दोस्रो चरणमा सर्वसाधरणका लागि बिक्रीमा ल्याइने बैंकले जनाएको छ ।
बैंकको सेयर किन्न इच्छुक लगानीकर्ताले आफूले लिन चाहेको सेयर संख्या र मूल्य स्पष्ट खुलाई गोप्य शिलबन्दी मार्फत आवेदन दिनु पर्नेछ ।
बिक्री मूल्य भने बिक्रेता अनुसार फरक फरक रहेकाले बैंकको केन्द्रय कार्यालयमा सम्पर्क गर्न बैंकले आग्रह गरेको छ ।
इच्छुक लगानीकर्ताले आजको ३५ दिन भित्र बैंकको केन्द्रीय कार्यालय, कमलादी, काठमाडौंमा आवेदन दिनुपर्नेछ ।
