काठमाडौं । सेयर बजारमा सामान्य गिरावट आएको छ । मंगलबार करिब ४ अंकले बढेको नेप्से आज साढे ५ अंकले घटेको हो ।
बुधबार नेप्से परिसूचक ५.५८ अंकले घटेर २०७९.७१ बिन्दुमा आइपुगेको छ । सूचकसँगै आज कारोबार रकममा पनि झिनो गिरावट आएको छ । अघिल्लो दिनको तुलनामा करोबार रकम ९ करोड घटेर आज ३ अर्ब ९९ करोड रुपैयाँमा सीमित भएको छ ।
बुधबार ३०६ कम्पनीको ८० लाख ४२ हजार ७६७ कित्ता सेयर किनबेच भएको छ ।
कारोबारमा आएका १३ वटा उपसमूहमध्ये ४ को परिसूचक बढेको छ भने ८ को घटेको छ । आज म्युचुअल फण्ड उपसमूहको परिसूचक सर्वाधिक ४.९२ प्रतिशतले बढेको छ । साथै, लघुवित्तहरुको सेयरमा पनि आकर्षण देखिएको छ ।
आज एनआरएन इन्फ्रास्ट्रक्चर कम्पनीको सर्वाधिक कारोबार भएको छ । यसको १९ करोड ३ लाख रुपैयाँको ३ लाख १५ हजार २५१ कित्ता सेयर किनबेच भएको छ ।
कारोबारमा आएका मध्ये ८३ कम्पनीको सेयर मूल्य बढेको छ भने १५८ कम्पनीको घटेको छ ।
आज भगवती हाइड्रोपावरको सेयर मूल्यमा पोजेटिभ सर्किट लागेको छ । यसका सेयरधनीले ठ्याक्कै १० प्रतिशत कमाएका छन् ।
अपर लोहोरे खोलाका सेयरधनीले भने सर्वाधिक ५.५१ प्रतिशत गुमाएका छन् ।
