काठमाडौं । यस सिजनमा बुधबार बिहानसम्म ६०० जनाभन्दा बढीले विश्वको सर्वोच्च शिखर सगरमाथाको सफल आरोहण गरेका छन् ।
पर्यटन विभागले बुधबार विज्ञप्ति जारी गर्दै आरोही सदस्य तथा क्लाईम्बिङ गाईड गरी यस सिजनमा ६०० जनाभन्दा बढीले सगरमाथाको सफल आरोहण गरेको प्रारम्भिक जानकारी प्राप्त भएको जनाएको हो ।
यस सिजनमा सगरमाथा आरोहणका क्रममा पाँचजनाको मृत्यु भएको र तीनजना अझै बेपत्ता रहेको विभागले बताएको छ । यस्तै, एक आरोहीको ल्होत्से आरोहणका क्रममा तेस्रो शिविरमा मृत्यु भएको विज्ञप्तिमा जनाइएको छ ।
सगरमाथा आरोहणका क्रममा मृत्यु हुनेमा दुईजना मंगोलिया, एकजना केन्या, एकजना भारत र एकजना नेपालका नागरिक रहेका छन् । रोमानियाका एक आरोहीको ल्होत्से आरोहणका क्रममा मृत्यु भएको हो ।
सगरमाथा आरोहणका क्रममा बेपत्ता भएका तीनजनामा दुईजना नेपाली र एकजना बेलायती छन् ।
