काठमाडौं । सेयर बजारमा उच्च अंकको वृद्धि भएको छ । नेपाल राष्ट्र बैंकले मौद्रिक नीति समीक्षामार्फत सेयर कर्जामा लचकता नपनाए पनि अन्य क्षेत्रमा कर्जा लगानीमा सहजीकरण गरेपछि नेप्सेमा उत्साह देखिएको हो ।
आइतबार नेप्से परिसूचक ४५.६९ अंकले बढेर २०६४.६९ बिन्दुमा पुगेको छ । आज सूचकसँगै कारोबार रकममा पनि उछाल आएको छ । ५ अर्ब २५ करोड रुपैयाँ बढीको १ करोड २२ लाख ४० हजार ८०२ सेयर किनबेच भएको छ । यो ३ महिना यताकै धेरै हो ।
कारोबारमा आएका १३ वटै समूहको परिसूचक बढेको छ । जीवन र निर्जीवन बीमा कम्पनीको सूचक सर्वाधिक ४ प्रतिशतभन्दा धेरैले बढेको छ ।
आज सीईडीबी हाइड्रोपावरको सर्वाधिक कारोबार भएको छ । यसको १४ करोड ८० लाख रुपैयाँ बढीको १ लाख ७८ हजार २२४ कित्ता सेयर किनबेच भएको छ ।
बढ्दो बजारमा आज ४ कम्पनीको सेयर मूल्यमा पोजेटिभ सर्किट लागेको छ । आत्मनिर्भर लघुवित्त, सबैको लघुवित्त, सामुदायिक लघुवित्त र नेरुडे मिर्मिरे लघुत्तिको सेयर मूल्य १० प्रतिशतले बढेको छ ।
माण्डू हाइड्रोपावरको सेयर मूल्यमा भने नेगेटिभ सर्किट लागेको छ । यसका सेयरधनीले १० प्रतिशत गुमाएका छन् ।
