काठमाडौं । राष्ट्रिय गौरवको आयोजना नागढुंगा-नौबिसे सुरुङमार्ग निर्माणको तीनचौथाई काम सकिएको छ ।आयोजनाले सार्वजनिक गरेको पछिल्लो विवरण अनुसार आइतबारसम्म सुरुङमार्गको समग्र भौतिक प्रगति ७४.३६१ प्रतिशत पुगेको हो ।
आयोजनाको अझै २५.६३९ प्रतिशत काम बाँकी छ । आयोजना अन्तर्गत सुरुङ खन्ने काम सकिए पनि फिनसिङ, लाइट जडान, लाइटिङ, अक्सिजन जडान, सडक ढलान लगायतको काम बाँकी छ ।
आयोजनाको मुख्य सुरुङ वैशाख ३ गते र आपतकालीन सुरुङ गत साउने २२ गते ब्रेक थ्रु गरिएको थियो । आयोजना निर्देशक नवीनमान श्रेष्ठका अनुसार मुख्य सुरुङ फिनसिङको काम ७६.१० प्रतिशत सकिएको छ । कुल २ हजार ६८८ मिटर लामो मुख्य सुरुङमध्ये हालसम्म २ हजार ४५.४० मिटर सुरुङ फिनसिङ गरिएको छ ।
फिनसिङसँगै अन्य काम पनि सँगसँगै भइरहेको उनले बताए । उनका अनुसार सुरुङमार्ग अन्तर्गत निर्मा गर्नुपर्ने संरचनामध्ये अब फ्लाइओभर मात्रै बनाउन बाँकी छ । हालसम्म फ्लाइओभरको ५ वटा सबस्ट्रक्चर निर्माण सम्पन्न भइसकेको छ भने अब अब सुपर स्ट्रक्चर मात्रै निर्माण गर्न बाँकी छ । यस्तै, फ्लाइओभर निर्माणका लागि आवश्यक जग्गामध्ये ९५ प्रतिशत अधिग्रहण गरिसकिएको आयोजनाले जनाएको छ ।
आयोजना अन्तर्गत निर्माण गर्नुपर्ने १२ वटा संरचनामध्ये ११ वटा संरचनाको निर्माण पूरा भइसकेको छ । आयोजना अन्तर्गत ३ वटा अण्डर पास, ४ वटा कल्भर्ट, ३ वटा पुल र एउटा ओभरपास निर्माण सम्पन्न भइसकेको छ । बलम्बुदेखि सुरुङमार्ग प्रवेश गर्ने मुख टुटिपाखासम्म २।३०७ किमी दुई लेन सडक कालोपत्र हुँदै छ ।
सुरुङमार्गमा गाडी गुड्न भने अझै ९/१० महिना लाग्ने आयोजनाले बताएको छ । सुरुङमार्ग संचालनको मोडालिटी टुंगो लाग्न पनि बाँकी रहेको छ ।
यो सुरुङमार्ग निर्माणको ठेक्का जापानी कम्पनी हाज्मा एन्डो कर्पोरेसनले पाएको छ । २२ अर्ब रुपैयाँमा ठेक्का लागेको यो आयोजनामा साढे १६ अर्ब रुपैयाँ जापान सरकारले ऋण सहयोग गरेको छ । बाँकी ६ अर्ब रुपैयाँ नेपाल सरकारले लगानी गरेको छ ।
सवारीसाधन गुड्ने यो नेपालकै पहिलो सुरुङमार्ग हो । सुरुङ सञ्चालनमा आएपछि काठमाडौंको थानकोटबाट ३ मिनेटमै धादिङको सिस्नेखोला पुगिने छ । आयोजना अन्तर्गत एउटा मुख्य र अर्को आपतकालीन सुरुङ रहेका छन् । मुख्य सुरुङमा केही भवितव्य परिहालेमा आपतकालीन सुरुङबाट उद्धार गर्न सकिन्छ । आपतकालीन र मुख्य सुरुङ जोड्न ७ वटा क्रस प्यासेज निर्माण गरिएको छ ।
४२ महिनामा निर्माण सक्नेगरी २०७६ कात्तिक ४ गते शिलान्यास गरिएको थियो । सम्झौता अनुसार सुरुङमार्गको काम २०८० वैशाखामा सम्पन्न हुनुपथ्र्यो । सो समयमा नसकिएपछि कोभिडको कारण ढिलाइ भएकोभन्दै ३ महिना (२०८० साउन ४ गतेसम्म) म्याद थप गरिएको थियो ।
सो अवधिमा पनि काममा प्रगति नदेखिएपछि दोस्रो पटक २०८१ वैशाख १३ सम्म म्याद थपिएको छ । दोस्रो पटक म्याद थपिएको समयमा पनि काम पूरा नभएपछि फेरि १ वर्ष म्याद थप्न प्रस्ताव गरिएको छ ।
