काठमाडौं । सेयर बजारमा लगातार पाँचौं दिन गिरावट आएको छ । गत चैत २८ गतेदेखि लगातार ओरालो लागेको नेप्सेले आज पनि सोही लय कायम राखेको हो । पछिल्ला ५ कारोबार दिनमा मात्रै नेप्से ६५ अंकले घटेको छ ।
बिहीबार नेप्से परिसूचक १९.५६ अंकले घटेर १९७२.१४ बिन्दुमा आइपुगेको छ आज ३१५ कम्पनीको २ अर्ब ९ करोड रुपैयाँ बढीको ५३ लाख ४४ हजार ६१३ कित्ता सेयर किनबेच भएको छ ।
आज कारोबारमा आएका १३ वटै समूहको परिसूचक राताम्मे भएको छ । लघुवित्त समूहको परिसूचक सर्वाधिक १.७२ प्रतिशतले घटेको छ ।
आज पनि गोर्खा फाइनान्सको सर्वाधिक कारोबार भएको छ । यसको १७ करोड ८२ लाख रुपैयाँ बराबरको २ लाख १५ हजार १४५ कित्ता सेयर किनबेच भएको छ ।
घट्दो बजारमा आज खानीखोला हाइड्रोपावरका सेयरधनीले सर्वाधिक ७.९४ प्रतिशत कमाएका छन् भने रुरु जलविद्युत्का लगानीकर्ताले ९.९९ प्रतिशत गुमाएका छन् ।
