काठमाडौं । सेयर बजारमा लगातार चौथो दिन गिरावट आएको छ । यस साता आइतबारदेखि लगातार ओरालो लागेको नेप्सेले आज पनि सोही लय कायम राखेको हो । ४ दिनमा नेप्से २९ अंक्ले घटेको छ ।
सूचकमा गिरावट आए पनि आज कारोबार रकम भने बढेको छ । अघिल्लो दिनको तुलनामा कारोबार रकम २४ करोडले बढेर २ अर्ब ५६ करोड रुपैयाँ पुगेको छ ।
बुधबार नेप्से परिसूचक ३.४३ अंकले घटेर २००६.७८ बिन्दुमा आइपुगेको छ । यसदिन ३२२ कम्पनीको ६४ लाख ८१ हजार ८३४ कित्ता सेयर किनबेच भएको छ ।
आज कारोबारमा आएका १३ वटा उपसमूह मध्ये ३ समूहको परिसूचक बढेको छ भने १० को घटेको छ । लघुवित्त समूहको परिसूचक सर्वाधिक १.६५ प्रतिशतले बढेको छ भने उत्पादनमूलक समूह १.७४ प्रतिशतले घटेको छ ।
आज सूर्यज्योति लाइफ इन्स्योरेन्सको सर्वाधिक कारोबार भएको छ । गत वर्षको नाफाबाट ३५ प्रतिशत लाभांश घोषणा गरेको यस कम्पनीको २५ करोड ५८ लाख रुपैयाँको सेयर किनबेच भएको छ ।
घट्दो बजारमा आज दुई लघुवित्तको सेयर मूल्यमा पोजेटिभ सर्किट लागेको छ । गुराँस लघुवित्त र विन नेपाल लघुवित्तका सेयरधनीले १० प्रतिशत कमाएका छन् ।
