काठमाडौं । सेयर बजारमा लगातार गिरावट आएको छ । आइतबार १७ अंकले घटेको नेप्से आज ६ अंकले घटेको हो ।
सूचकसँगै आज कारोबार रकममा पनि गिरावट आएको छ । अघिल्लो दिनको तुलनामा कारोबार रकम ३३ करोडले घटेर २ अर्ब ८७ करोडमा सीमित भएको छ ।
सोमबार नेप्से परिसूचक ६.२६ अंकले घटेर २०१२.०७ बिन्दुमा आइपुगेको छ । यसदिन ३१५ कम्पनीको ७२ लाख ९० हजार २०० कित्ता सेयर किनबेच भएको छ ।
आज कारोबारमा आएका १३ वटा उपसमूह मध्ये होटल र व्यापार बाहेक अरु सबै समूहको परिसूचक राताम्मे भएको छ । होटल समूहको परिसूचक सर्वाधिक १.१६ प्रतिशतले बढेको छ भने फाइनान्स समूह ०.६६ प्रतिशतले घटेको छ ।
आज सर्वोत्तम सिमेन्टकोे सर्वाधिक कारोबार भएको छ । यसको ४७ करोड २९ लाख रुपैयाँ बराबरको ५ लाख १४ हजार ४११ कित्ता सेयर किनबेच भएको छ ।
घट्दो बजारमा आज दुई कम्पनीको सेयर मूल्यमा पोजेटिभ सर्किट लागेको छ । मायाखोला हाइड्रोपावर र गुराँस लघुवित्तका सेयरधनीले ठ्याक्कै १० प्रतिशत कमाएका छन् ।
आज रिभर्स फल्स पावरका सेयरधनीले भने सर्वाधिक ९.९८ प्रतिशत गुमाएका छन् ।
