कञ्चनपुर । महाकाली नदीमा निर्माणाधीन चार ‘लेन’को पुलको काम ५ महिनापछि पुनः सञ्चालन भएको छ । निर्माण कम्पनीले बाँकी काम ६ महिनाभित्र सक्नेगरी सुरु गरेको जनाइएको छ ।
विसं २०७४ मा निर्माण सुरु भएको चार लेनको पक्की पुलसँगै ८.६ किलोमिटर ६ लेन सडक निर्माणको ९०.१९ प्रतिशत वित्तीय प्रगति भइसकेको छ । निर्माण कम्पनी कुमार-सीएफइसी जेभीका इन्जिनियर किशोरराज पाण्डेयले गत वर्षको काम गरेबापत रु ८ करोड ५० लाख रकम हालै कम्पनीलाई प्राप्त भएको जानकारी दिए ।
इन्जिनियर पाण्डेयले पुलसँगै निर्माण हुने पोखरीको तटबन्ध डिजाइन स्वीकृत भएर ‘भेरिएसन’का लागि सडक विभागमा पुर्याउने प्रक्रियामा रहेको जानकारी दिए । ‘भेरिएसनका कारण अझै रु १५ करोड बक्यौता छ,’ उनले भने, ‘गत वर्षको रकम पाएपछि हामीले बाँकी निर्माणको काम थालिसकेका छौँ ।’
उनले ८.६ किलोमिटर ६ लेनको पहुँचमार्गमध्ये १ हजार ५०० मिटर सडक कालोपत्र गर्न बाँकी रहेको बताए । ‘रकम अभावलगायतका कारण नभए ६ महिनाभित्र पुलको सबै काम सकिन्छ,’ इन्जिनियर पाण्डेयले भने । पुलको लागत रु ३ अर्ब ६६ करोड हो ।
पुलको दुवैतर्फ बाँध बाँधेर पर्यटकीयस्थल हुनेगरी पोखरी निर्माण गरिएको छ । पुलको उत्तरतर्फ एक वर्गकिलोमिटरभन्दा ठूला दुईवटा पोखरी र दक्षिणतर्फ ०.३ वर्गकिलोमिटरका दुईवटा पोखरी निर्माण भएका छन् ।रासस
