काठमाडौं । निजी क्षेत्रमा प्रवाह भएको कुल कर्जामध्ये झन्डै १६ प्रतिशत कर्जा गैरबैंकिङ वित्तीय संस्था (बैंक तथा वित्तीय संस्था बाहेक)हरुले लगानी गरेको पाइएको छ ।
नेपाल राष्ट्र बैंकले सोमबार सार्वजनिक गरेको ‘वित्तीय क्षेत्र सर्वेक्षण र अन्य वित्तीय संस्था सर्वेक्षण’ अध्ययन प्रतिवेदनले यस्तो देखाएको हो ।
राष्ट्र बैंकका अनुसार गत असारसम्म समग्र वित्तीय क्षेत्रले निजी क्षेत्रमा कुल ५७ खर्ब ९४ अर्ब ७६ करोड रुपैयाँ कर्जा लगानी गरेका छन् । त्यसमध्ये गैरबैंकिङ वित्तीय संस्था (नागरिक लगानी कोष, कर्मचारी संचय कोष, बीमा कम्पनी लगायत)ले ९ खर्ब १५ अर्ब रुपैयाँ कर्जा लगानी गरेका हुन् । यो कुल कर्जा लगानीको १५.७९ प्रतिशत हो ।
गत असार मसान्तसम्म समग्रमा प्रवाह भएको कुल कर्जाको ८४.२१ प्रतिशत हिस्सा रहेको छ । यस अवधिमा बैंक तथा वित्तीय संस्थाहरुले निजी क्षेत्रमा ४८ खर्ब ९७ अर्ब रुपैयाँ कर्जा लगानी गरेका छन् ।
यस्तै, गत असारसम्म गैर बैंकिङ वित्तीय संस्थाहरूबाट मात्र ८ खर्ब ८६ अर्ब रुपैयाँ निक्षेप परिचालन भएको राष्ट्र बैंकको तथ्यांकले देखाएको छ ।
खुद वैदेशिक सम्पति २४.५ प्रतिशत बढ्यो
गत वर्ष वित्तीय क्षेत्रको खुद वैदेशिक सम्पति २४.५ प्रतिशतले बढेको छ । २०७९ असार मसान्तमा ११ खर्ब ४९ अर्ब ६४ करोड रुपैयाँ रहेको विदेशी सम्पति २०८० असार मसान्त आइपुग्दा बढेर १४ खर्ब ५२ अर्ब ३ करोड रुपैयाँ पुगेको छ ।
यस्तै, यसै अवधिमा खुद आन्तरिक सम्पति ८.६ प्रतिशतले मात्र बढेको राष्ट्र बैंकको तथ्यांकले देखाएको छ । २०७९ असार मसान्तमा आन्तरिक सम्पत्ति ६३ खर्ब ५ अर्ब ८१ करोड रुपैयाँ रहेकोमा २०८० असार मसान्तमा बढेर ६८ खर्ब ५० अर्ब ३० करोड रुपैयाँ पुगेको छ । वित्तीय क्षेत्रको यस्तो सम्पति २०७८ असार मसान्तमा ५४ खर्ब ५३ अर्ब र २०७७ असार मसान्तमा ४३ खर्ब २९ अर्ब १० करोड रुपैयाँ रहेको थियो ।
वित्तीय क्षेत्रको तरल दायित्व २०७९ असार मसान्तमा ४८ खर्ब १८ अर्ब ४ करोड रुपैयाँ रहेकोमा ११.६ प्रतिशतले वृद्धि भएर २०८० असार मसान्तमा ५३ खर्ब ७८ अर्ब ४२ करोड रुपैयाँ पुगेको छ । वित्तीय क्षेत्रको यस्तो दायित्व २०७८ असार मसान्तमा ४५ खर्ब ५४ अर्ब १९ करोड र २०७७ असार मसान्तमा ३७ खर्ब ४७ अर्ब ५४ करोड रुपैयाँ रहेको थियो ।
वित्तीय क्षेत्रभन्दा बाहिर चलनचल्तीमा रहेको मुद्रा २०७९ असारमा ५ खर्ब २ अर्ब ७६ करोड रहेकामा १.१ प्रतिशतले बढेर २०८० असारमा ५ खर्ब ८ अर्ब ३७ करोड पुगेको छ राष्ट्र बैंकले जनाएको छ । वित्तीय क्षेत्रभन्दा बाहिर रहेको यस्तो मुद्रा २०७८ असार मसान्तमा ५ खर्ब ६६ अर्ब ९५ करोड र २०७७ असारमा ४ खर्ब ८५ अर्ब ६८ करोड थियो ।
