काठमाडौं । सेयर बजारमा लगातार दोस्रो दिन सुधार आएको छ । सोमबार १३ अंकले बढेको नेप्से आज ९ अंकले बढेको हो ।
आज सूचकमा सुधार देखिए पनि आज कारोबार रकममा भने गिरावट आएको छ । अघिल्लो दिनको तुलनामा कारोबार रकम १५ करोडले घटेर १ अर्ब ८६ करोडमा सीमित भएको छ । यो डेढ महिना यताकै कम हो ।
मंगलबार नेप्से परिसूचक ९.३४ अंकले बढेर २००१.६४ विन्दुमा पुगेको छ । यसदिन ३०८ कम्पनीको ५२ लाख ३९ हजार ४१६ कित्ता सेयर किनबेच भएको छ ।
आज कारोबारमा आएका १३ वटा उपसमूहमध्ये ७ समूहको परिसूचक बढेको छ भने ६ को घटेको छ । उत्पादनमूलक समूहको परिसूचक ३.५२ प्रतिशतले बढेको छ भने फाइनान्स ०.२८ प्रतिशतले घटेको छ ।
आज सोनापुर सिमेन्टको सर्वाधिक कारोबार भएको छ । यसको १४ करोड १९ लाख रुपैयाँ बढीको ३ लाख १३ हजार २९५ कित्ता सेयर किनबेच भएको छ ।
बढ्दो बजारमा आज दुई कम्पनीको सेयर मूल्यमा पोजेटिभ सर्किट लागेको छ । बोटलर्स नेपाल बालाजु र बीपीडब्ल्यू लघुवित्तको सेयर मूल्य ठ्याक्कै १० प्रतिशतले बढेको छ ।
आज चिरख्वा हाइड्रोपावरका सेयरधनीले भने सर्वाधिक ५.०६ प्रतिशत गुमाएका छन् ।
