काठमाडौं । उद्योगी, व्यवसायीहरुले प्रहरीले सीजी होल्डिङ प्रबन्ध निर्देशक अरुण चौधरीलाई हठातमा पक्राउ गरेको बताएका छन् ।नेपाल उद्योग परिसंघले बिहीबार साँझ पत्रकार सम्मेलन गर्दै यस्ताे धारणा सार्वजनिक गरेको हो ।
नेपाल उद्योग परिसंघका अध्यक्ष राजेश अग्रवालले प्रहरीले चौधरीलाई कुनै पूर्वसूचना नदिई हठातमा पक्राउ गरेको बताए । उनले प्रहरीले चौधरीलाई अनुसन्धानमा समेत नबोलाई कतै भाग्न लागे जस्तै गरी हठातमा पक्राउ गरी मानमर्दन गरेको बताए ।
उनले प्रहरीले पक्राउ गर्न पाउने भए पनि कुनै सूचना नदिएको भन्दै आपत्ति जनाए । उनले सरकारले लगानी सम्मेलनको मुखैमा व्यवसायीलाई धरपकड गर्दा स्वदेशी व्यवसायी नै पलायन हुने अवस्था आउने चेतावनी समेत दिए ।
यस्तै, नेपाल उद्योग वाणिज्य महासंघले एक विज्ञप्ति जारी गर्दै चौधरी पक्राउको विरोध गरेको छ । विस्तृत अध्ययन नगरी व्यवसायीलाई पक्राउ नगर्न पटक पटक आग्रह गर्दै आइए पनि त्यसलाई वेवास्ता गर्दा व्यवसायीहरु निरुत्साहित हुने महासंघले बताएको छ ।
‘महासंघले सम्बन्धित विषयको गहिरो अनुसन्धान नभएसम्म व्यवासायीलाई पक्राउ नगर्न सरकारलाई पटकपटक आग्रह गर्दै आएको छ । पहिले गिरफ्तार गर्ने र त्यसपछि समस्या पहिल्याउन प्रवृत्तिले देशमा वर्तमान व्यवसायिक परिदृश्बाट पहिले नै निराश भएका व्यवसायीलाई थप निरुत्साहित बनाएको छ,’ महासंघद्धारा जारी विज्ञप्तिमा भनिएको छ ।
पहिले सत्यतथ्य पत्ता लगाएर मात्र आवश्यक परे कानुनी कारबाही अगाडि बढाउनुपर्ने महासंघको भनाइ छ । ‘महासंघ यस विषयमा पहिले सत्यतथ्य पत्ता लगाएर आवश्यक परे कानुनी कारबाही अघि बढाउन सरकारलाई आग्रह गर्दछ,’ विज्ञप्तिमा भनिएको छ ।
बाँसबारी छाला जुत्ता उद्योगको १० रोपनी जग्गा हडपेको आरोपमा अनुसन्धान गर्न प्रहरीको केन्द्रिय अनुसन्धान ब्युरो (सीआइबी)ले आज दिउँसो चौधरीलाई पक्राउ गरेको थियो ।
