काठमाडौं । सेयर बजारमा उच्च अंकको वृद्धि भएको छ । आज बजार खुलेदेखि उकालो लागेको नेप्से अन्त्यमा ३१ अंकले बढेर बन्द भएको हो ।
वाणिज्य बैंकहरुले माघका लागि निक्षेपको ब्याजदर घटाएसँगै त्यसको प्रभाव सेयर बजारमा देखिएको हो । सूचकसँगै आज कारोबार रकम पनि उत्साहजनक छ । यस दिन ५ अर्ब ४५ करोड रुपैयाँ बढीको सेयर किनबेच भएको छ ।
आइतबार नेप्से परिसूचक ३१.६२ अंकले घटेर २१२०.६२ विन्दुमा पुगेको छ । आज ३१४ कम्पनीको १ करोड ६६ लाख ५ हजार २३४ कित्ता सेयर किनबेच भएको छ ।
कारोबारमा आएका १३ वटा उपसमूहमध्ये होटल र व्यापार बाहेक अरु सबै समूहको परिसूचक बढेको छ । हाइड्रोपावर समूहको परिसूचक सर्वाधिक ४.५८ प्रतिशतले बढेको छ ।
आज नेपाल पुनर्बीमा कम्पनीको प्रमोटर सेयर सर्वाधिक कारोबार भएको छ । यसको साढे ३५ करोड रुपैयाँ बढीको सेयर किनबेच भएको छ । त्यस्तै, सोनापुर सिमेन्ट २४ करोड र हाथवे इन्भेष्टमेन्ट ११ करोड बढीको कारोबार हुँदै शीर्ष तीनमा रहे ।
उच्च अंकले बढेको बजारमा आज १२ कम्पनीको सेयर मूल्यमा पोजेटिभ सर्किट लागेको छ । हिमालयन पावर, कालिका पावर, तेह्रथुम पावर, मध्य भोटेकोशी र माथिल्लो मैलुङखोलाको सेयर मूल्य ठ्याक्कै १० प्रतिशतले बढेको छ ।
त्यस्तै, त्रिशूली जलविद्युत्, मुक्तिनाथ कृषि कम्पनी, नेपाल वेयरहाउजिङ, हिमालयन रिइन्स्योरेन्स, दिव्यश्व्री हाइड्रोपावर, रसुवागढी हाइड्रोपावर र दोल्ती पावरका सेयरधनीले पनि करिब १० प्रतिशत कमाएका छन् ।
