काठमाडौं । एभरेष्ट बैंक नेपाली सेयर बजारमा सबैभन्दा महँगो सेयर मूल्य हुने वाणिज्य बैंक बनेको छ । स्ट्याण्डर्ड चार्टर्ड बैंकलाई उछिन्दै एभरेष्ट सर्वाधिक महँगो सेयर मूल्य हुने बैंक बनेको हो ।
नेपाल स्टक एक्सचेन्ज (नेप्से)का अनुसार सोमबार (११:१० बजेसम्म) एभरेष्ट बैंकको सेयर मूल्य प्रतिकित्ता ६.७० रुपैयाँ बढेर ५२९ रुपैयाँ पुगेको छ । यसै समयमा चार्टर्डको सेयर मूल्य प्रतिकित्ता ५१८ रुपैयाँमा करोबार भइरहेको छ ।
सर्वोच्च अदालतको फैसलापछि चार्टर्डले एफपीओ जारी गर्दा प्राप्त प्रिमियमको करबापत ९१ करोड रुपैयाँ तिर्नुपरेपछि आइतबार चार्टर्डको मूल्य प्रतिकित्ता १० रुपैयाँले घटेको थियो ।
चार्टर्ड र एभरेष्ट दुवै विदेशी लगानीका बैंक हुन् ।पछिल्लो समय दुवै बैंकको वित्तीय सूचकहरुमा सुधार आइरहेको छ भने सेयर मूल्य पनि लगातार उकालो लागिरहेको छ ।
चार्टर्ड गत महिना मात्रै नबिल बैंकलाई पछिपार्दै सर्वाधिक महँगो सेयर मूल्य हुने वाणिज्य बैंक बनेको थियो । विगतका वर्षहरूमा बम्पर लाभांश दिँदै आएको नबिलले यसपटक इतिहासकै कम ११ प्रतिशत मात्रै लाभांश दिएपछि त्यसयता सेयर मूल्य ओरालो लागिरहेको छ ।
