काठमाडौं । सेयर बजारमा दोहोरो अंकको वृद्धि भएको छ । गत मंगलबारदेखि उकालो लागेको नेप्से आज लगातार चौथो दिन बढेको हो ।
सर्वोच्च अदालतले शुक्रबार मर्जर र एफपीओमा बार्गेन पर्चेज गेनबापत कर तिर्नुपर्ने आदेश दिएपछि आज बिहान बजार खुल्ने बित्तिकै नेप्से ३७ अंकले घटेको थियो । तर, पछि सम्हालिँदा अन्त्यमा २७ अंकले बढेर बन्द भएको हो ।
वाणिज्य बैंकहरुले पुस महिनाका लागि निक्षेपको ब्याजदर घटाएसँगै सेयर बजारमा त्यसको सकारात्मक प्रभाव परेको हो । आइतबार नेप्से परिसूचक २७.७५ अंकले बढेर २०२२.३५ विन्दुमा पुगेको छ । नेप्से झन्डै ३ महिनापछि २ हजार विन्दुमा उक्लेको हो ।
सूचकसँगै आज कारोबार रकममा पनि उछाल आएको छ । आज ५ अर्ब १५ करोड बढीको सेयर किनबेच भएको छ । यो ५ महिना यताकै उच्च हो । आज २९५ कम्पनीको १ करोड ७१ लाख ६६ हजार ४६५ कित्ता सेयर किनबेच भएको छ ।
आज कारोबारमा आएका १३ वटा उपसमूहमध्ये १० समूहको परिसूचक बढेको छ भने ३ को घटेको छ । हाइड्रोपावर समूहको परिसूचक सबैभ्न्दा धेरै ५.५५ प्रतिशतले बढेको छ ।
आज हिमाल दोलखा हाइड्रोपावरको सर्वाधिक कारोबार भएको छ । यसको २५ करोड रुपैयाँ बढीको सेयर किनबेच भएको छ ।
दोहोरो अंकले बढेको बजारमा आज १ दर्जन बढी कम्पनीको सेयर मूल्य बढेको छ । बोटलर्स नेपाल (बालाजु), रिडी पावर, शिवश्री हाइड्रोपावर, बलेफी हाइड्रो, भूगोल इनर्जी, दोर्दीखोला, सगरमाथा जलविद्युत् विन्ध्याबासिनी हाइड्रोपावर, हाथवे इन्भेष्टमेन्ट, थ्रीस्टार, रावा इनर्जीको सेयर मूल्य ठ्याक्कै १० प्रतिशतले बढेको छ ।
