एजेन्सी । पछिल्लो समय नेपाली बजारमा मात्रै होइन दक्षिण एशियाका प्रायः सबै मुलुकहरुमा प्याजको मूल्य आकाशिदै गएको छ ।
भारतले असोजदेखि प्याज निर्यातमा प्रतिबन्ध लगाएपछि त्यसको प्रत्यक्ष असर छिमेकी देशहरुमा परेको हो । नेपाललमा हाल प्याजको मूल्य प्रतिकेजी २५० रुपैयाँको हाराहारीमा पुगिसकेको छ ।
प्याजको मूल्य आकाशिएसँगे चोरले पसलबाट पैसा होइन प्याज चोर्न थालेका छन्। चोरहरुले पसल फोरेर पैसा होइन प्याज चोरे भन्दा पत्यार नलाग्न सक्छ । तर, भारतको पश्चिम बंगालस्थित पूर्वमिदनापुरमा एक सब्जी पसल फोडेर चोरले प्याज चोरेका छन् ।
अचम्मको कुरा के छ भने चोरहरूले पसलमा राखिएको पैसा भने छुँदा पनि छोएनन्, केवल प्याज, लसुन र अदुवा मात्रै लिएर भागे।
हिन्दी न्यूज १८ को अनुसार अजय दासको पसलबाट ५० हजार बराबरको प्याज र लसुन चोरी भएको छ । दासले राम्रो मूल्यमा बेच्नका लागि प्याज ठूलो भण्डारण गरेर राखेका थिए । दासले भने, ‘पछि राम्रो भाउमा बेच्नको लागि पसलभित्र प्याज भण्डार गरेर राखेको थियौँ, तर बिहान पसलमा आउँदा त सबै प्याजहरु चोरी भएछ ।’
भारतमा अहिले एक किलो प्याजको मूल्य भारू १०० रुपैयाँ पुगेको छ । भारतीय व्यापारीहरूले बढी मुनाफा कमाउनका लागि प्याज भण्डरान गरेर राखेको बताइएको छ ।
सरकारले प्याज किन्न पनि सीमा तोकेको छ । भारतीय सरकारले प्याजको मूल्य नियन्त्रण गर्न पनि प्रयास गरिरहेको छ।एजेन्सी
