काठमाडौं । सेयर बजारमा दोहोरो अंकको करेक्शन आएको छ । अघिल्ला तीन कारोबार दिनमा लगातार ७७ अंकले बढेको नेप्सेमा आज दोहोरो अंकको गिरावट आएको हो ।
सूचकसँगै आज कारोबार रकममा पनि गिरावट आएको छ । अघिल्लो दिनको तुलनामा कारोबार रकम २६ करोड घटेर १ अर्ब ७५ करोडमा सीमित भएको छ ।
सोमबार नेप्से परिसूचक ११.२७ अंकले घटेर १८९६.६७ विन्दुमा आइपुगेको छ । यसदिन २९० कम्पनीको ६० लाख १७ हजार ३९७ कित्ता सेयर किनबेच भएको छ । आज ६१ कम्पनीको सेयर मूल्य घटेको छ भने जम्मा ६६ कम्पनीको बढेको छ ।
कारोबारमा आएका १३ वटा उपसमूहमध्ये ९ समूह्को परिसूचक घटेको छ भने ४ को बढेको छ । जीवन बीमा उपसमूहको परिसूचक सबैभन्दा धेरै ०.८९ प्रतिशतले घटेको छ ।
आज सोनापुर सिमेन्टको सेयर सर्वाधिक किनबेच भएको छ । यसको पौने ८ करोड रुपैयाँ बढीको कारोबार भएको छ ।
दोहोरो अंकले घटेको बजारमा पनि आज अपर स्याङ्गे हाइड्रोपावरको सेयर मूल्यमा पोजेटिभ सर्किट लागेको छ । यसका सेयरधनीले ठ्याक्कै १० प्रतिशत कमाएका छन् ।
स्वाभिमान लघुवित्तका सेयरधनीले भने सर्वाधिक ८.०४ प्रतिशत गुमाएका छन् ।
